قالت : مش بحب جو الخصام ابدا و لازم ابادر انا بالصلح مع زوجى مهما كان هو الى غلطان و دا بيتعبنى جدا
هو ليه الراجل مش بيصالح مراته ؟
حبيبتى :
فيه ناس كتير مش بتعرف تبادر ابدا بالصلح حتى لو هى الى غلطانة
بيبقى عندها قناعة ان الاعتذار ضعف و اهانة
ولو بادر بصلح مراته هتذله بغلطه مثلا او هيبان ادامها ضعيف
للاسف قناعات اتربى عليها و يصعب تغييرها الا لو هو اقتنع ان دا غلط
ركزى دايما على الهدف
مش على مين الى هيبدأ
الهدف اننا نتصالح و دا هدف جميل و نبيل
ساعات الرجل بيبقى كمان زعلان من نفسه مش منك بس هو مش عارف يفرق بين الاتنين
و ساعات بيزعل من اسلوبك فى الكلام الى فيه اتهام و نقد لاذع او لوم و تأنيب مؤلم
الراجل مش طفل صغير لازم نتكلم معاه باحترام
لو الخصام حصل بسبب انك غلطتى اعتذرى و حاولى تصالحيه بالتدريج
ولو هو الى بدأ بالغلط خدى وقتك لحد ما تهدى تماما و بعدين ابدئى اتكلمى عادى بالتدريج على قدر استطاعتك
ماتعديش تترجيه و تتوسلى اليه انه يصالحك و يسامحك لو دا بيوجعك و يؤلمك و خاصة لو هو بيتقل عليكى او مش قادريكلمك كويس لانه لسة موجوع
اديله وقته لحد مايصفى و هو هيتكلم عادى تانى مع الوقت
مش كل الناس اول ما التانى يعتذر بيعرف يسامح علطول فيه ناس محتاجة وقت
أهم حاجة تكونى صادقة و صريحة مع نفسك و تعترفى باى غلط بدر منك فى الاسلوب
و قوليله انا اتضايقت جدا لما حصل منك كذا
و انا غلطانه انى قلت او عملت كذا
ما تجيش على نفسك و تغصبيها الا لو انت مؤهلة نفسيا للصلح خلاص
للاسف عدم وجود اعتذار من الطرف التانى بيخليكى دايما شايلة
و ياسلام لو هو الى غلطان و كمان بيتقل و يتقمص بتكون حاجة مؤلمة بالطبع
بس حاولى تتناسى و مع الوقت هتنسى لو قاومتى تذكر الاساءة
الناس الى مش بيحبوا الخصام دول بيبقى غالبا قلبهم ابيض و بيتناسوا و مع الصلح و الكلمة الحلوة بينسوا علطول و اظن انك منهم
بس مش معنى انك كدة يبقى زوجك لازم يكون كدة ولازم يبادر او لازم يصلحك علطول .الناس مختلفون فى طبايعهم
و تذكرى دوما ان خيرهم الذى يبدأ بالسلام
ليست هناك تعليقات:
إرسال تعليق