سألتنى : أنا مخطوبة بقالى سنة بس حاسة ان خطيبى مش بيحبنى ..لا بيتكلم معايا و يحكيلى عن حياته و لا بيهتم بى انا رحت فين و جيت منين وكل لقاءاتنا رسمية ...
أكمل و الا لأ ؟
- الشباب الى زى كدة أنواع :
فيه شخصية مش بتعرف تحب أصلا ...و دى شخصية عايشة لحياتها بيتجوز علشان واحدة تخدمه و تشوف طلباته ...و دا ماتفرقش معاه هيحبها و الا لأ
و فيه واحد ماحبش بس لازم يتجوز لأسباب بيولوجية بيختار واحدة كويسة تكون زوجة كويسة و ام لاولاده و ما تفرقش معاه بيحبها برده و الا لأ
و فيه واحد اهله الى مختارين ليه و مجبر على قبول اختيارهم لان هم الى بيصرفوا و يجهزوا و يمكن كمان هم الى لسة بيصرفوا عليه شخصيا و دا متجوز واحده علشان تخدمه و تخدم اهله
و فيه واحد حب و ماطالش معرفش يرتبط بالى بيحبها فبيدور على واحدة ينسى معاها الحب القديم بس لسة فى قلبه الحب القديم
او اتقدم لواحدة كويسة على أمل انه يحبها ..بس محصلش الحب ..وماعندوش الشجاعة انه يفسخ الخطوبة لانها بنت كويسة و ماعملتش فيه حاجة ...و مش عايز يصدمها
المهم النتيجة النهائية ان هو ماحسش بالحب تجاهها ..
و الحب يعنى انفتاح كامل و رغبة فى الحديث معاها فى كل الامور الى تخصك و رغبة فى معرفة كل تفاصيلها ..
و انجذاب ليها و رغبة فى القرب الجسدى منها ...
و احساس عميق بانك عايزها هى بالذات تكون شريكة حياتك مش واحدة كويسة و السلام ممكن اى واحدة تانية تحل مكانها
أما قرارك انك تكملى و الا لأ ...فدا قرار راجع ليكى انت
لو انت من النوع العاطفى و الحب بالنسبة ليكى أهم حاجة فى الدنيا ...يبقى ماتكمليش
لو انت من النوع العملى و اهم حاجة عندك الشقة و الشبكة و العفش و الفرح و خلافه ...يبقى تكملى ...بس ما تشتكيش بعد كدة من الجفاف العاطفى لان دا اختيارك
لو انت عايزة تتجوزى علشان خايفة تعنسى او ضغط الاهل او شايفاه عريس لقطة مش هيتعوض أو لاحتياج نفسى و بيولوجى
ممكن تكملى بس تكونى عاملة حسابك انك هتتعبى اوى علشان تملكى قلبه
و محتاجة تذاكرى كويس طبيعته النفسية و مداخله و مخارجه و عقده علشان تعرفى الطريق الى قلبه ...
و ممكن يحصل الحب و ممكن مايحصلش ...فالقلوب بايد ربنا
أنا رأيى الشخصى و من الى بشوفه من مشكلات بسبب فقدان الحب
و بالرغم من ان المتحابين كتير بيضيعوا الحب بعد الزواج بالمشاكل و العقد النفسية و سوء الاخلاق
لكن أنا لا أوافق أبدا على الزواج بدون حب
لكن فى النهاية بلاقى البنات عليهم ضغوط نفسية و مجتمعية بتخليهم يقبلوا الزواج بدون حب
بس المهم مايجوش بعد كدة و يشتكوا
ليست هناك تعليقات:
إرسال تعليق