سؤال متكرر
مش هقدر اقول كتب ..لانى معرفش الكتب الموجودة فى مصر
اول ما ينزل كتابى فى المكتبات هقولكم عليه طبعا
بس هقول لكم على موضوعات مهم جدا تعرفوها
أولا : الاختلافات النفسية بين الرجل و المرأة بصفة عامة ...و من أوائل الكتب الى ظهرت فى المجال دا ( الرجال من المريخ والنساء من الزهرة )
الاختلافات دى بدأت تتقارب فى بعض البيئات الاجتماعية و الثقافية ..
لكن لازلت موجودة فى غالبية المجتمع
لما بتعرف الاختلافات بتفهم هو ليه بيفكر كدة و هو ليه بيتصرف بالطريقة دى ..بدل ما انت طول النهار تشتكى منه
ثانيا : علم تحليل الشخصية ....فيه تقسيمات كتيرة للشخصيات الانسانية واختلافاتها عن بعضها البعض ...ودا بيساعدك جدا على فهم نفسك و فهم الآخر و تحديد نقاط الاختلاف الى بينكم ..علشان تقدروا توصلوا فيها لحل وسط
ثالثا : فنون التواصل الاجتماعى ...و دى فيها كتب كتيرة جدا و من أوائل الكتب الى ظهرت فى المجال دا (كيف تكسب الاصدقاء و تؤثر فى الناس )
و دا بيديك مهارات للتواصل مع كل الناس و اهمهم بالطبع شريك حياتك
رابعا : التنمية البشرية ....ازاى أطور نفسى و شخصيتى و قدراتى النفسية علشان اكتسب الثقة فى نفسى
وانصح فيه بكتب استاذ ابراهيم الفقى ..بسيطة و سهلة كبداية و بعدين ادخلوا على الاجنبى فيها روائع
مشكلة الشخصية غير الواثقة من نفسها انها دايما محتاجة للآخر و معتمده عليه وحاسة احساس مزمن بالضعف و القهر و الظلم ...
الشخصية دى بتكون متعبة فى الجواز ..بسبب هذا الاحساس المزمن
خامسا : مهارات عقلية ...ازاى اطور قدرتى على حل المشكلات و اتخاذ القرارات و التخطيط للمستقبل .. غير مهارات التفاوض و الاقناع
تطوير العقل و تنمية الذكاء مهم جدا ...لتطوير الحوار بينكم و كيفية الوصل الى قرارات مشتركة و حل للمشكلات
سادسا : مهارات ايمانية ...قلبك الموصول دايما بربنا سبحانه و تعالى يمنحك القوة و القدرة و الصبر و الرضا و الاحساس بالنعمة ...و دى كلها عوامل بيساعدك على تخطى الآلام و الصعاب و التسامح و النظرة الايجابية للحياة ككل
يلا شيدوا حيلكم فى السنة الجديدة
و خلوا سنة 2015 هى سنة التغيير
و بداية التغيير كما قال لنا ربنا وهو الاعلم بخلقه ب ....اقرأ
ربنا يجعلها سنة سعيدة على الجميع يارب
ليست هناك تعليقات:
إرسال تعليق