ينشأ الطفل و هو يرى والده ما بيعملش حاجة فى دنيته الا انه بيخرج الصبح من البيت و يرجع ....يعد يطلب طلبات و يزعق شوية و بعدين يدخل ينام ...علشان يصحى تانى و هكذا
و يرسخ فى ذهنه مع الوقت ان هذا هو دور الرجل فى اسرته ..يروح الشغل ..و ييجى ياكل و يزعق ..و ينام علشان يروح الشغل تانى
لو ولد ..و هو شايف الوضع دا ..هيكبر و هيقوم بنفس الدور لما يتزوج
و لو بنت هيرسخ فى ذهنها ان دا دور الست انها تشيل الشيلة كلها ...و هتخلى جوزها بشكل لاواعى تماما انه يبقى كدة ..و بعدين تشتكى من سلبيته ..و هى السبب
لو والد الطفل بيعمل كدة ...انت تربى فى اولادك (بنات و اولاد ) ان دا ليس الدور الصح
هتقوليلهم بابا بيتعب قفى شغله ...علشان كدة مش بيقدر يلعب معاكم و لا يتكلم معاكم و لا يذاكر معاكم و لا يخرج معاكم
معلش هو مش هيقدر ...بس دا مش الصح
و مش بابا بس ...انت كمان غلطانه ...انك شايلة كل حاجة....و دا مش دور الأم
علميهم المشاركة من صغرهم و خاصة لو عندك بنات و اولاد
انتم الاتنين هترتبوا اودتكم مع بعض
انتم الاتنين هتدخلوا تعملوا العشا النهاردة
انتم الاتنين هتنضفوا الحمام مع بعض
انتم الاتنين هتخرجوا تشتروا طلبات من السوبر ماركت مع بعض
انت كدة بتربى الولد على المشاركة فى مسئولية البيت ..و بتربى البنت على انها مش مسئولة وحدها
و لو حد من اولادك سألوا ليه بابا و ليه انت ؟..قوليلهم احنا اتربينا غلط ...و انا اتمنى انى اربيكم صح
ليست هناك تعليقات:
إرسال تعليق