لما تيجى تمدحى ابنك فى طفولته المبكرة امدحيه على افعال محددة صحيحة هو عملها
و عبرى عن اعجابك بيه
ماتقوليش انت ذكى ..قولى انت النهاردة ذاكرت كويس وجبت الدرجة النهائية فى الامتحان الفلانى
ما تقوليش انت مؤدب ..قولى انت قعدت هادى و احنا فى زيارة طنط النهاردة
ماتقوليش انت صادق ....قولى كويس جدا انك قلت الحقيقة النهاردة
المعانى او المبادىء المجردة ( الذكاء - الادب - الصدق ) لايعيها الطفل دون سن المدرسة
اظهرى الافعال الجميلة التى يفعلها طفلك و امدحيها علشان يشجعه على تكرارها
فيه امهات تسرف فى مدح اولادها و توصفهم بكل الصفات الرائعة طول النهار و الليل
فبيتعود الطفل على كلمات المدح دى بصفة مستمرة
و عندما يخرج للحياة و يواجه بفشل او يرتكب الخطأ او يسمع كلمات ذم ينهار و يكره من يذمه
و ممكن تلاقيه مش عارف يعمل علاقات مع الاطفال الى حواليه لانهم دايما مش شايفينه كويس زى ما ماما شايفاه
اما ينعزل عنهم ......و اما يعاديهم و يبقى شرس معاهم
و لما يكبر مش هيحس انه كويس الا فى حضن ماما
ولما صديقه أو شريك حياته يواجهه بعيبه او اخطاؤه ...هيحس برده انه انسان سىء و مش هيقدر يحبه
زى ما بنقول امدحى الافعال الطيبة ..لكن لاتسرفى فى مدح كل صغيرة و كبيرة هو بيعملها
و لا تتجاهلى الأخطاء ...بل تعاملى مع الخطأ بمنتهى الحزم
و فهميه ان كل الناس حتى انت كأم بتغلطى ..
و مش عيب انه يغلط ....العيب انه يكرر الغلط و هو عارف انه غلط أو يصر عليه
لا تسرفى فى المدح ..و لا تسرفى فى الذم
فان احسن قولى احسنت
و ان اساء قولى اخطأت
ليست هناك تعليقات:
إرسال تعليق