للاسف قاعدين طول النهار نشخط و نزعق و افعل و لا تفعل لاولادنا و احنا بنتصرف بشكل غلط كتير
و لما اولادنا يوجهونا او يزعلوا مننا نزعل منهم و نحس ان دا مش احترام
كما لو ان الاحترام انى اسيب ابويا او امى يغلطوا فى من غير ما اقولهم
او الاحترام انى اسيبهم يؤذونى بالصراخ و الشتيمة و العقاب و اسكت و ما انطقش
بنتعامل مع اولادنا كانهم عبيد عندنا من حقنا نصرخ و نضرب و نشتم و نهزق و هم مش من حقهم حتى يعترضوا
انا لما اكون بتصرف تصرف غلط و ابنى ييجى يقول لى انت غلطت ياماما و انت المفروض ماكنتيش تعملى كدة
انا بكون سعيدة جدا ....انى نجحت فى انى اربى عنده المبدأ و الولاء للمبدأ و ليس للأشخاص ..
فالمبدأ ثابت و الانسان يخطىء و يصيب
يمكن الواحد بيتضايق لما يكون مكسوف من نفسه
ساعات الام تكذب و تحكى حكاية مش مظبوطة ادام اولادها او تزود و تنقص منها على هواها و لما اولادها يعترضوا و يقولوا كدة ماحصلش تتضايق و تزعق لهم
الاولى انك تحكى الحكاية بمنتهى الصدق علشان تعلميهم الصدق
لما الاب يصرخ و يشتم و الابن يعترض ...تلاقى الاب يغضب و يتعصب
انت تحمد ربنا ان ابنك بيعترض على الغلط و دا دليل ان شخصيته قوية ..دى ميزة مش عيب فى ابنك ..دا العيب فيك انت
لما ابنك يعترض على تصرفك او سلوكياتك معاه ...هو بينبهك لحاجات انت بتعملها و مش بتاخدى بالك منها لكنها ممكن تكون مؤذية ليه
فانتبه ليه ...و خلى بالك من تصرفاتك علشان تكسب دايما حبه و احترامه و صداقته
مش علشان انت أم ..أو انت أب فانت معصوم من الغلط و مش من حق اولادك يعترضوا على تصرفاتك
ابنائك هم أقرب ناس هيشوفوك على حقيقتك و هيقولولك على اخطائك الى انت مش بتاخد بالك منها
بلاش تنكر و تبررو تزعل و تقولهم كدا عيب ..
علمهم بس الانتقاد بأدب و احترام و الانتقاد يكون فى السر بينى و بينهم ..و
خليك معاه كدة برده مش تؤمرهم بحاجة انت مابتعملهاش
طالما كلامهم معاك بأدب و احترام
اعترف اكرم لك بغلطك ....علشان تعلمهم انهم يعترفوا ..
و اعتذر علشان تشجعهم على الاعتذار ..
و اوعدهم انك هتحاول تصلح الغلط
و ما تزعلش طالما نصحهم ليك بأدب و احترام الى انت المفروض تكون بتتعامل بيه معاهم
ليست هناك تعليقات:
إرسال تعليق