قالت : زوجى بينزل كل يوم يعد مع اصحابه بعد الشغل على القهوة و يرجع نص الليل ..و اليوم الى يعده فى البيت يبقى معاهم على الشات و الموبايل
اعترضت كتير مفيش فايدة
حبيبتى
الانسان محتاج اصدقاء فى حياته ..زى ما هو محتاج لشريك حياة ...
انت كمان محتاجة الاتنين
زوجك يبدو انه من النوع الاجتماعى الى له اصدقاء كتير ...اصدقاؤه دول بيشبعوا عنده حاجة انت مش هتقدرى تديها ليه ..هو محتاج الجو الاجتماعى
لكنه للاسف فاشل فى احداث التوازن بين اصدقائه و بيته
الرجالة بيحبوا يقعدوا مع بعض لأنهم بيفهموا بعض ..بيتكلموا نفس اللغة .....نفس المشاكل ..نفس الافكار ..نفس الاهتمامات ..نفس المشاعر ...بيلاقوا نفسهم متقاربين جدا مع بعض بيهزروا مع بعض ..بيجيبوا فى سيرة الستات (المزز ) مع بعض
الكلام معاك بيكون مختلف ..و ساعات بيكونوا اتنين متباعدين جدا فى افكارهم و اهتماماتهم و مش قادرين يفهموا بعض ..فبيخلى القاعدة بينهم مملة و غير ممتعة ...فى حين انها ممتعة جدا مع اصحابه
انت نفسك لو ليكى صديقات او حتى مع والدتك و اخواتك هتحسى انك بترتاحى فى الكلام معاهم اكتر من جوزك ....
للاسف عقلية الرجالة مختلفة عن عقلية الستات ....
لكنهم مشكلة الاتنين انهم مش قادرين يفهموا الاختلاف دا و مش قادرين يستوعبوه ..و لا قادرين يتقبلوه و يحتووه
لازم تحددى انت الاول انت عايزة ايه ؟
يعنى لو قفل التليفزيون و اللاب و الموبايل و قعد فى البيت و ..و..و...
هتعدوا تعملوا ايه ؟
حددى انت عايزة ايه بالظبط
هل عايزاه مثلا يتكلم معاك و يسمعك ...
و الا عايزاه يخرج معاك ..
الا عايزاه يساعدك فى البيت مثلا ..
والا تتفرجوا على حاجة مع بعض
لما تطلبى اطلبى حاجة محددة متقوليش اقعد معايا فى البيت ..
طب هقعد نعمل ايه ؟هو هيقول لنفسه كدة
انت محتاجة تتعلمى ازاى تجذبيه للقاعدة معاك
دا هيعتمد عليكى انت ..انت الى ممكن تجذبيه و ممكن تزهقيه
تجذبيه بكلامك و حديثك الحلو ...باغرائك و الاثارة و المتعة ....بالمشاعر و العواطف و الرومانسية ....بانكم تعملوا حاجة مع بعض ..تطبخوا حاجة مع بعض ...تخرجوا مع بعض ...تقرأوا ..تتفرجوا على دراما مع بعض و يبقى وقت ممتع و ظريف
انا مش عايزاك تطالبيه ..لانك مهما طالبتيه مش هيستجيب ...حتى لو استجاب هيفضل مشغول عنك برده ...لانه مش مستمتع معاك ...
لكن قدرتك على انك تجذبيه ليكى هى دى الى هتجيبه على ملا وشه
ليست هناك تعليقات:
إرسال تعليق