المراهق عليه واجبات تجاه نفسه و تجاه اسرته
و يعانى الآباء بشدة فى كيفية جعل المراهق يؤدى الواجبات الى عليه
زى مثلا المذاكرة ..زى ترتيب حجرته و اشيائه ..زى واجباته نحو اخواته الى اصغر منه ..واجباته فى مساعدة والدته ...واجباته فى مساعدة والده
بتختلف الواجبات دى من بيت للتانى ...بس المهم يكون فيه واجبات ..علشان ما يطلعش انانى مايهموش الا نفسه ..و علشان نربى راجل مسئول بجد (سواء ولد و الا بنت )
حط الحد الادنى من الواجبات دى الى هى مطلوبة منه ..اكتبها ....علشان تكون واضحة فى ذهنك ..وواضحة ليه تماما
مش كل يوم تطلب منه طلب جديد تتخانق عليه ..هو كدة مش بيبقى عارف راسه من رجليه
مش كل يوم بحالات ..يوم تطلب يرتب اودته و تزعق و تهلل و يوم تطنش ولا كأنه عمل حاجة
اقعد معاه و قل له واجباتك ناحية اسرتك ..واحد ..اتنين ..تلاتة
و انا واثق انك بتحب الاسرة دى و انك هتؤدى الواجبات دى على اكمل وجه
هسيبلك الحرية انك تعملها فى الوقت الى انت عايزه ...بس المهم تتعمل
طبعا المراهق فى الاول هياخد الكلام من هنا و هيطلعه من الناحية التانية ...خلى بالك هو بيختبر طولة بالك و صبرك و اصرارك على تأدية الواجبات دى
هيبدأ يطنش علشان يستفزك
هيطنش علشان يشوف رد فعلك ..الكلام الى انت قلته دا جد و هتثبت عليه و الا كلام و خلاص
هنقول تانى ..و تالت ..و رابع ..و عاشر ..انت مطلوب منك تعمل كذا
على سبيل المثال :
اعتقد اننا اتفقنا ان الاودة تترتب قبل ما ننزل الصبح المدرسة
اوعى ترتبى انت الاودة ..سيبى الدنيا مفركشة ...لو انت رتبتيها يبقى خلاص كل سنة و انت طيبة ضاع كل كلامك فى الهوا ....
خلاص هو اتعلم انه لما يطنش انت هتقومى بالمهمة بداله ...و هيتعود على اسلوب الطناش فى اى امر هتقوليه
انشاله تعدى اسبوع كامل خليه يعانى من منظر الاودة و فركشتها ...سيبيه علشان يتعلم
لو لقيتى فى يوم بيعملها و يوم لأ ....يبقى دا تقدم ممتاز ..اشكريه على انه عملها و بوسيه و احضنيه و حسسيه انك سعيدة انك رتبت الاودة ..نشاله مرة فى الاسبوع ..دا تقدم
اوعى تنتقدى ترتيبه الى اى كلام ....الترتيب الى اى كلام دا انجاز فى حد ذاته ...هيتعلم الاتقان مع الوقت ...خليكى صبورة
بصى بصفة عامة لما تطلبى من ابنك يعمل حاجة هو مستحيل هيعملها بنفس درجتك فى الكم و الكيف ....احتفلى باى تقدم مهما كان بسيط و شجعيه ..بدال ماتعدى تنتقديه ..النقد هيخليه يرتد تانى الى الخلف
أهم حاجة انه يحس ان دى مهمته ..و ان محدش تانى هيقوم بيها ..وان الطناش هييجى فوق دماغه و هو الى هيعانى منها
طب لو الموضوع طول ..اسبوعين تلاتة و برده مفيش اى تقدم و ماعملهاش و لا يوم ... هنعمل ايه ؟
سننتقل الى المرحلة التانية بمنتهى الهدوء ..بمنتهى الاحترام ..بمنتهى الحب
خليكى معانا
ليست هناك تعليقات:
إرسال تعليق