سألت ابنى مرة عندما ساءت الاوضاع بيننا
حبيبى عايزنى اتعامل معاك ازاى ؟
قال لى بصى يا ماما
انا عارف كويس اوى الصح و الغلط
لان دى حاجة اتغرست فينا خلاص من صغرنا
بس دا لايمنع انى اغلط
ساعات بغلط حب استطلاع و حب تجربة
ساعات بغلط من ضغط الاصحاب
ساعات بغلط عند واثبات انى حر و كبير و اعمل الى انا عايزه
ساعات اغلط لان لسة خبراتى فى الحياة قليلة
بس الى انا عايزه منك انك تكونى واثقة فى انى هرجع
و بلاش تعنيف و لوم و صراخ لان دا بيخلينى بصراحة اعند
و لما اغلط نبهينى بالراحة انى ماعملتش كذا او عملت كذا
و انا صدقينى لما بتتكلمى بهدوء و احترام هتكسف على دمى و هتأثر جدا اكتر من الصراخ و التبكيت و التعنيف الى بيخلينى اعند و اطنش كلامك
و من يوميها و انا ماشية معاه بما يرضى الله
و لقيت المشكلة انى مش عايزاه يغلط
من كتر ما بشوف المصايب الى فى المجتمع ببقى خايفة عليه زيادة
مع انه من حقه انه يغلط علشان يتعلم .
من حقه انه يجرب علشان يحس ليه دا غلط و يعرف عواقبه
من حقه انه يقتنع ان دا غلط مش مجرد انه يتلقاه منى بس
و لو حسسته انه عيل صغير هيتصرف كعيل صغير
لكن لما احسسه انه راجل و مسئول عن تصرفاته و افهمه معنى الحرية المسئولة هيحاول يكون أهل للثقة دى
و لو انت غرست فيه قيم و اخلاق من صغره صدقنى هيرجع عن الغلط و لو بعد حين
ليست هناك تعليقات:
إرسال تعليق