فيه تلات أوقات جوزك بيبقى محتاجك أوى فيهم
حاولى بقدر ما تستطيعى انك تكونى جنبه و معاه و تفضى نفسك تماما ليه فى الاوقات دى
يعنى فى الاوقات دى هو يكون نمرة واحد قبل الاولاد و شغل البيت و التليفونات و المسلسلات و الواتس أب
و ياريت تكونى مهندمة كدة و شكلك كويس
و ياسلام لما تكونى مبتسمة كمان
و يكون كلامك كله عاطفى و داعم و محفز و مشجع
وهو نازل الشغل الصبح :
اتعودى انك تقومى و تصحيه بشكل لطيف و محبب ..دلعيه
لو بتفطروا تحضرى الفطار وانت مبتسمة و غاسلة وشك و مسرحة شعرك و غاسلة سنانك وحياة ابوك
و تودعيه و انت بتدعيله و كلمات التشجيع و التحفيز ..و تبوسيه و تحضنيه ...
خليه نازل شغله و هو متحمس و مبسوط
وقت الرجوع من الشغل :
أصعب وقت على الراجل ...و اكتر وقت بتحصل فيه الخناقات لانه بيبقى راجع مش طايق نفسه ..و عايز ياكل و يرتاح
برده حاولى تتجنبى شره فى الوقت دا بانك تكونى لابسة و متشيكة و راسمة على وشك ابتسامه حلوة ...
و استقبليه على الباب و بوسيه و احضنيه و حسسيه انه انسان مرغوب فيه و انه واحشك و انك طول النهار منتظراه
و يكون الاكل جاهز ...و لو متضايق متعديش تقولى مالك و تزنى ...سيبيه هو لو حب يحكى هيحكى
و ماتعديش ترغى كتير هو الوقت دا بيبقى مش طايق يسمع صوت و لا يسمع مشاكل و شكاوى و طلبات
قبل النوم بالليل :
خليه دايما الوقت الخاص بتاعكم
حديث الوسادة دا مهم جدا
بعد ما تخلصوا كل المهام اليومية ..و بعد ما الاولاد يناموا
عودى نفسك انك تدخلى تنامى معاه ..وانك تلبسى لبس النوم و تتسرحى و تتعطرى سواء هيحصل حاجة و الا لأ ...
خليه لما يصحى بالليل يلاقى منظر حلو ادامه ..
تتكلموا شوية مع بعض ...تتبادلوا كلمات و مشاعر لطيفة ...شغلى موسيقى هادية جنبكم ...شغلى اضاءة بسيطة ...خليه وقت هادىء ليكم انتم الاتنين دا الوقت بتاعكم انتم بس
و حياة أولادك يا شيخة ...بطلى طلبات و نقد و شكوى و زن
اتعلمى تتكلمى كلام حلو و رقيق
مدح ..امدحى على اد ماتقدرى
غزل ..تغزلى على أد ما ربنا يقدرك
كلام ايجابى كله امل و تفاؤل
وانت كمان عزيزى ..اسع الى هذه الاوقات الثلاثة ..و حافظ عليها و على وجودها جنبك
و ما تكسرش مآديفها و تحبطها ...بالتكشيرة و النقد و الكلام اللاذع ...ولو مش قادر خلاص بلاش تتكلم خالص ..اسمع بس
و خليك ايجابى فى الاوقات دى بقدر الامكان ..و حاول تسعدها بالابتسامة و الكلام الطيب و اللمسات العاطفية ..علشان يبقى وقت سعيد ليكم انتم الاتنين
..علشان تقدر تسعدك ..لازم تسعدها
و علشان تقدر تعطيك ..لازم تعطيها
و علشان تسعد بحبها ...لازم تحبها
ليست هناك تعليقات:
إرسال تعليق