تلات أوقات مراتك بتحتاج فيهم دعم نفسى منك انت بالذات
دعم نفسى يعنى تكون معاها ...تكون معاها بالجثة و العقل و القلب مش بالجثة بس ..واقف جنبها ...تطبطب عليها ..تاخدها فى حضنك ..تسمعها و انت ساكت ...يا اما تقول كلمات ايجابية حلوة ..تفكر معاها لو طلبت رايك
- أوقات الاجهاد الجسمانى :
لما تكون مجهدة او مريضة محتاجة اوى وجودك جنبها ...و المرض دا يشمل آلام الحمل ..و الولادة طبعا ..و آلام الطمث لو لسة عندها آلام
أوعى تفتكر انها بتدلع ..هى فعلا تعبانة
أوعى تتجاهل مرضها و تعد تطلب منها طلباتك اليومية المعتادة
أوعى تحسسها انك متضرر و زهقان من انها مريضة
مش هقولك ساعدها فى مهامها ..لكن على الاقل الكلمة الحلوة و اللفتة اللطيفة ( هاتلها الدوا و الماية ...اعمل له كوباية حاجة سخنة ...بوسها على اورتها و قول لها سلامتك يا حبيبتى )مهمة جدا جدا بالنسبة ليها
لو تقوم تخدم نفسك فى اليوم دا يبقى كتر خيرك ...
بس اوعى يا حبيبتى تستحلى المرض ...و بطلى دلع ..هو طاقته يوم واحد يومين بالكتير ...ما تستنيش لما يزهق و يضيع كل الى عمله بالتجاهل
- أوقات الاجهاد النفسى :
و طبعا هى مجهدة نفسيا علطول ....من العيال و مشاكلهم و مسئولياتهم مع طلبات البيت ..مع ممكن مشاكل الشغل كمان
هى مجهدة الى أن يثبت عكس ذلك
هى كل الى عايزاه منك فى الوقت دا انك تسمع لها ...اسمع باهتمام
و ياسلام لو كلمات تعاطف كمان ..انا مقدر تعبك ..الله يكون فى عونك ..انا حاسس بيكى ...طب اساعدك ازاى
وانت ياروح قلبى ...لما تتكلمى و تشغلى شريط الشكاوى ...تأكدى على نقطة مهمة انت مش بتشتكى منه لاسمح الله ...و لا بتلوميه حاش لله ..انت بس بتفضفضى ....ركزى على النقطة دى انك بس بتفضفضى
- أوقات السعادة
و دى اوقات قليلة اوى فى حياة الانثى الكئيبة بطبعها ...الشكاية بالجبلة ...اللوامة بالسليقة ..الى شايفة دايما الدنيا سودا سودا
بس الاوقات دى بتكون محتاجة اوى تشاركها فرحتها ...
لو حاجة سعيدة فى شغلها ..شجعها و حفزها و ما تعدش تعتت فيها
لو عملت حاجة حلوة ..طبخة جديدة ...قصة شعر جديدة ...اشترت هدوم جديدة ...عملت عمل فنى جديد .....انجزت اى انجاز هى فرحانة بيه
و لقيت على وشها السعادة ماتعدش تكسر مآديفها ..
امدحها و قول لها برافو عليكى انت هايلة ..انت ممتازة ..مهما كنت شايف الحاجة دى هايفة و ماتستاهلش
الستات لو الدنيا كلها شجعتها و جوزها قال حاجة تانية بتتكسر نفسها أوى أوى ...شاركها فرحتها ...و امدحها و شجعها
الدعم النفسى للست أهم عندها من الفلوس
هى متجوزة علشان تكون شريك حياتها ..راجلها الى واقف جنبها فى فرحها و حزنها
هى مكانتش جعانة أكل فى بيت والدها
بس ممكن أوى كانت جعانة حب و حنية و مساعدة و دعم
اسعدها علشان تقدر تسعدك
ليست هناك تعليقات:
إرسال تعليق