ليه الراجل بيتجاهل مايضايق مراته ؟
تصدر من الزوج تصرفات او كلمات بتضايقها
فتعبر عما يضايقها لزوجها بمنتهى الوضوح
فهو يسمع الكلام و لا كأنه اتقال ....و يعيش حياته عادى جدا
ممكن يكون السبب هو قناعات ذكورية قبيحة راسخة فى مجتمعاتنا
ان الست لازم تطبع بطباع جوزها و لازم تتعود على قرفه
او انا حر ..انا راجل و اعمل الى انا عايزه ..هى مش هتتحكم فىّ
او انه لو استجاب هتركبه و تسيطر عليه
و ممكن يكون هو مش بيحبها اصلا و مش بيحاول يرضيها
و ممكن يكون هو شخصية انانية مش بيفكر الا فى نفسه بس و رغباته و عمره مافكر فيها
و ممكن يكون متجوز واحدة تخدمه و تراعيه مالهاش الحق انها تكون سعيدة معاه
ممكن تكون هى السبب ...
ممكن تكون فعلا هى شخصية مسيطرة و عايزة تغيره على مزاجها ..
ممكن يكون اسلوبها زبالة بتخليه يعند ...و دول الاكثرية الطافحة
ممكن تكون بتنبه لحاجات كتيرة اوى ..وبتتعامل معاه كطفل عايز يتربى
فهو حاسس انه فقد الامل خلاص انه يرضيها لان كل تصرفاته مش عاجباها
و ممكن يكون هى كمان بتؤذيه ببعض التصرفات و هى مش عايزة تبطل ......فبيعاملها بالمثل
طب نعمل ايه ؟
سيدتى :
اكتبى لستة بكل الحاجات الى مش عاجباكى فى جوزك لانها مضرة بيكى (مش علشان هى مختلفة عنك ) و نفسك تتغير
و بعدين رتبيهم من الاكثر ضررا الى الاقل ضررا
و نركز على واحدة بس ..الاكثر ضررا ....و نحاول ننوع فى الاساليب ...المباشرة و غير المباشرة مع الدعاء الى الله تعالى حتى يتم الله عليكى بالاستجابة ..ركزى على حاجة واحدة بس
و انت سيدى :
اصرارك على اضرارها بيخلى الغلطات الصغيرة تكبر ...
فالصغيرة مع الاصرار بتتحول لكبيرة
و كونك مش مقتنع ان افعالك مضره ليها ...دا لايعنى انها غير مضرة
كونك مش مقنع بالتغيير ..و عايز تعودها على طبعك المؤذى ...دا لايعنى انها لاتتألم ...و ممكن مع الوقت يحصل انفجار
زى واحد مش مقتنع باهمية تغيير زيت العربية ...ومش بيغيره ...لكن دا مضر بالعربية
زى واحد مش مقتنع ان الكوتشات لازم تتغير بعد مدة ...ومش عايز يغيرها ..بس دا نذير ان ممكن تحصل مصيبة
والحاجة الى نفسى الرجال يعرفوها ان الانسانة غير السعيدة بتطلع اطفال مشوهين نفسيا ..وانتوا شايفين منظر الاجيال الجديدة عاملة ازاى
انت فاكر ان الاذى واقع عليها بس ..الاذى متعدى للاولاد ...لان الى بتعمله فيها بتطلعه هى فى اولادك بشكل لا ارادى تماما
لو بتفكر فى دقايق تعمل تبادل ادوار ..و تتخيل ان هى الى بتعمل التصرف البغيض الى انت بتعمله ..و شوف احساسك هيكون ايه
ماتقلش الراجل مش زى الست ...الست بشر بنى آدم زيك بالظبط
ادام ربنا زيك بالظبط ..
و الى بتعمله فيها ..اذى مستمر ليها وظلم ليها ربنا هيحاسبك عليه
و النهاية
طول ماهى امرأة غير سعيدة ...عمرك ما هتحس بالنجاح فى حياتك و لا بالسعادة
فالسعادة الرائعة فى الحب ...و طول ما انت مؤذى ليها عمرك ماهتحس بالحب دا
و الأمر متروك اليك
ليست هناك تعليقات:
إرسال تعليق