قيود النجاح

الناس هتقول على ايه
الناس لو عايزة تتكلم هتتكلم
دا لما جالهم نبى مرسل من السماء اتكلموا عليه
الرسول صلى الله عليه و سلم اتقال عليه مجنون و ساحر فى وسط الكفار
و اتكلموا فى عرضه و شرفه و اتكلموا عن عائشة رضى الله عنها فى وسط المؤمنين
يعنى مفيش فايدة ..الناس هتتكلم هتتكلم
ولايهمك كلام الناس ..اعمل الصح الى انت عايزه و شايفه و سيب الى يتكلم يتكلم
كلامهم لاهيضرك ولا هينفعك


لازم اعملها صح
مش لازم كل حاجة تتعمل صح بنسبة 100% لما تتعمل بنسبة 70% احسن لما ما تتعملش خالص

مش عارف ابدأ منين
ابدأ من أى حتة و من أى مكان ..المهم تبدأ فى الوقت المناسب طول ما انت بتدور على الوقت المناسب مش هييجى ابدا ابدأ الآن أو اصنع انت الوقت المناسب


انا غبى و مفيش منى أمل
مش لازم تكون ذكى علشان تنجح
فيه اغبياء كتير اوى فى الدنيا دى نجحوا بالتعلم و المثابرة و المجهود
المتخلفين عقليا الى بنشوفهم ابطال رياضات خير دليل على ذلك
انت مش متخلف عقليا .....والعلم يقهر الغباء ...المحاولة باسلوب علمى بيخليك قمة الذكاء



مفيش فايدة
اكتب الكلمة دى فى ورقة و قطعها و ارميها فى الزبالة
اكيد فيه فايدة ..بس محتاج اسلوب ووسيلة جديدة غير الوسيلة و الاسلوب الى كنت ماشى بيه
لما تلاقى طريقك لشغلك فيه اصلاحات اكيد بتدور على سكة تانية
حاول تانى ..المهم يكون باسلوب تانى


بكرة ان شاء الله 

 طالما قلت هبدأ من بكرة يبقى مش هتبدأ
ابدأ من دلوقت

مش هقدر 

لو حاجة ممكن تنجزها لكن محتاجة مجهود كبير
قسمها على مراحل صغيرة
انت لو عايز تبنى بيت ومش معاك فلوس تكفى
هتحط الاساس بالفلوس الى معاك الاول
و لما تتوفر فلوس تانى هتطلع بأول دور
لاتنتظر لحد مايبقى معاك كل فلوس البناء ..فقط ابدأ
قسم التحدى الكبير الى تحديات أصغر ...و خد وقتك
فانجاز حاجة صغيرة هتشجعك على انك تكمل ..فقط ابدأ

انا كدة و مش هتغير
قول الحقيقة
أنا مش عايز أتغير
أو أنا مش قادر أتغير
فكر بالعقل
لو التغيير فى صالحك ..ابدأ ..التغيير صعب ...لكنه ممكن
لو عايز توصل للدور التانى ..لازم تطلع السلالم ..سلمة سلمة
مش هتنط مرة واحدة للدور التانى
ابدأ من أول سلمة علشان توصل للقمة