سألت : هو ليه الرجل لايهتم بأمور العلاقات الزوجية و تربية الاولاد زى المرأة ؟
الرجل مع العلاقات الانسانية بصفة عامة غير المرأة
من أول هو طفل
بتلاقى علاقة الولد مع اصحابه أو مع اخواته علاقة تنافسية اكتر
يعنى دايما يفكر مين الاقوى ...فتلاقيهم علطول لعبهم اشتباك بالايدى
دايما يلعبوا مع بعض العاب تنافسية ..زى مثلا الكورة و المصارعة و الفيديو جيم الى فيها تنافس
ممكن مايعرفوش عن بعض كتير ..يعنى علاقاته مش عميقة .... سطحية ..يعنى تيجى تسأليه عن تفاصيل فى حياة صاحبه الى بقالهم تلات سنين مع بعض مايعرفش
غير البنت
الى بتلاقى علاقاتها مع اصحابها او اخواتها علاقة اكثر مودة
لعبهم مع بعض العاب فريق واحد مش فريقين ..بيلعبوا مع بعض مش ضد بعض
بيتكلموا مع بعض كتير و تلاقيهم عارفين عن بعض حاجات كتير اوى ..يعنى علاقاتهم بتكون عميقة اكتر
و لما يكبروا كدة برده
يعنى نادر لما تلاقى راجل يحكى عن حياته الزوجية مع اصحابه و لا يحكى الا لو فعلا تعبان اوى
و تلاقى الست من اول قاعدة جابت حياتها الزوجية من أول العلاقة فى المطبح لحد أودة النوم ..و علاقتها باولادها و مشاكلهم
الرجالة لما يعدوا مع بعض اغلب كلامهم عن انجازاتهم فى حياتهم و اشغالهم و السياسة و الكورة و الامور العامة
النساء اغلب حواراتهم عن بيوتهم و ازواجهم و اولادهم
دا مش عيب فى الرجل ..ولا عيب فى المرأة ..
لكنه تأهيل لدور كل واحد منهم فى تكوين الاسرة
علشان كدة دايما بقول ان مسألة العلاقات فى الاسرة و صحتها بتعتمد الى حد كبير على المرأة
و قدرتها على فهم طبيعة الرجل و نظرتها ليه انه مش جاف ولا قاسى ولا معندوش قلب ولا بيطنش
بقدر ان هذه المسائل ليست من اولوياته
وممكن كمان ساعات بيبقى خايف منها جدا ..
لانه بيلعب فى منطقة مش بيفهم فيها اصلا ..
و هو عارف كدة كويس
حتى تلاقيهم دايما يشتكوا انهم مش فاهمين المرأة ..و عايزين مجلدات علشان يفهموها
و يشتكوا انها نكدية و بتزعل من حاجات ما يتزعلش منها
يعنى هو مش بيفهم
ليه بتزعلى لما ما يقولكيش هو زعلان ليه
لما مايعبركيش لما تكونى متضايقة
لما ما يجبش هدايا فى المناسبات
لما ما يعبرش عن اهتمامه صباحا و ظهرا و مساءا
بيبقوا عاملين فى علاقتهم زى اتنين بيحفروا حفرة (تعميق العلاقة )
واحد عايز ينزل فى العمق (المرأة تريد تعميق العلاقة ) و تعد تحفر فى نفسها و تحفر فيه و تحاول تطلع كل الخبايا
وواحد قاعد يردم فيها (عايزها سطحية غير عميقة ) ..لاعايز يتكلم و لا عايز يقول خباياه
عزيزتى :
الرجل غيرك فى مسألة العلاقات ...
هو فاكر ان علاقته بمراته هتكون زى علاقته بوالدته ومش فاهم الفرق
و ساعات بيكون خايف بالفعل ..خايف من الفشل ..بس مش عارف يعمل ايه علشان يتجنب الفشل دا
كل ماكنت فاهمة الفرق بينكم هتقدرى تعبرى عن نفسك و تقوليله احنا مختلفين فى النقطة دى ...و هتقدى تتقبليه اكتر ...و تاخديه جوة الحفرة بالراحة خالص و من غير مايحس
عزيزى
مراتك مش حشرية
مراتك عايزة تعرف عنك كل كل حاجة ..زى ماهى بتقولك كل كل حاجة
كتمانك دا بيخليها تحس انك مش واثق فيها و بيحسسها كمان بعدم الأمان معاك
لو هى مش أهل للثقة ...قل لها مشكلتها بالظبط ..قل لها انك بتتكلمى كتير مع الناس ..انك بتنتقدى كتير ..انك بتتحشرى كتير
يمكن تعرف تصلح نفسها
ولو انت طبعك اصلا كتوم .قل لها ..دا طبعى ..دى مش قلىة ثقة فيكى ..بس انا مش بحب اتكلم الا لما ببقى عايز اتكلم ..طمنها دايما انك بتحبها وواثق فيها و هقولك كل حاجة فى الوقت المناسب
ليست هناك تعليقات:
إرسال تعليق