قالت : زوجى علطول بيتريق على و على تخنى و دى حاجة تؤلمنى جدا
حبيبتى :
كان الله فى عونك
اعلم ان الامر مؤلم جدا
و تفقد المرأة ثقتها فى نفسها مع الوقت و تفقد قدرتها على انقاص وزنها
و قد تكره نفسها اصلا و تشعر بالذنب و دا يدفعها الى المزيد من التخن اكتر
لازم ترفضى هذا الأمر تماما
لازم تعيدى الثقة فى نفسك ....لازم تعرفى ان الانسان مش بشكله الانسان بعقله و قلبه و روحه
لازم تحسى بالاحترام لنفسك قبل ما تطلبى الاحترام من غيرك
أهم حاجة يكون كلامك واضح و حازم و مختصر و مباشر جدا
يعنى : من فضلك ...انا بحس باهانة شديدة لما تتريق على شكلى ..انا ارفض هذا الاسلوب تماما و لن اسمح بيه ...نقطة
ماتعديش تبررى كتير و تشرحى كتير و تتكلمى و ليه و ازاى ...
كلام واضح و صريح و مباشر ..من غير خصام
خليكى واثقة فى نفسك
قوليله لو انا تخينة ..بس دمى زى العسل
لو انا مليانة ..بس قلبى ابيض من الحليب
لو انا مش عارفة ايه ...بس عيونى تسحر
محدش كامل ...بس انا عندى امكانيات جميلة و كل صحباتى بيحسدونى عليها
حسسيه بانك واثقة فى نفسك علشان مايحسش انك تحت سيطرته
البسى و اتشيكى فى البيت حتى لو كنت تخينة .. بلاش شغل الاستخسار فى لبس البيت و تجيبى البيجامات الرخيصة و الهدوم الى اى كلام
ستات كتير تخينة لكن انيقة وواثقين من نفسهم و من جمالهم
لو مفيش فايدة ..و اعاد التريقة
كرريها بنفس الاسلوب كذا مرة .كل مرة يعملها
لو مفيش فايدة
زودى الخصام مع الرفض لمدة محدودة ..يعنى اعملى نفسك زعلانة لفترة محدودة ..يعنى بقية اليوم مثلا
لو مفيش فايدة
فيه عقوبات عدوانية خبيثة تانية بأة بصراحة مبحبش اشور بيها بس للاسف ..ولازم تتعمل بالعقل و الحكمة ...علشان يحس كم هذا مؤلم
زى مثلا اثارة غيرته بانك تتملى فى جمال الممثل و الا المطرب الفلانى ادامه
تقوليله مثلا دنا اخويا بيقولى انت احلويتى اكتر بعد الجواز
و الا انا زميلى بيقولى .....
بس انا غير مسئولة عن اى اصابات ممكن تحصل
ليست هناك تعليقات:
إرسال تعليق