قالت : أنا عروسة جديدة ..و طبيخى حلو على حسب رأى جوزى
بس كل ما أعمل أكلة جديدة يقولى بس مش زى بتاعت ماما
أسألى ماما بتعملها ازاى ..و انا بتضايق أوى
بصى يابنتى
الواحد عنده مرارة واحدة و مش عايزها تتفقع بدرى
اطبخى بالطريقة الى انت عايزاها ..و بتعرفى تعمليها ...اعملى الى انت عايزاه و ماتسأليش فيه و هو هيتعود مع الوقت على أكلك أنت ..و هينسى أكل ماما
عايز ياكل اكل مامته يروح يتعزم عندها ..او يجيب مامته اهلا و سهلا تطبخ له الى هو عايزه
بلا دلع ماسخ
قوليله من فضلك مامتك اتقنت الطبيخ بعد 30 سنة جواز ...لما اكمل 30سنة جواز هيبقى اكلى زى أكل مامتك بالظبط
قوليله انا بتضايق من المقارنة دى من فضلك ماتقولش كدة تانى ...انا مش زى مامتك ..
مرة و اتنين و تلاتة لحد ما يتوقف
مصمم برده
دوقيه من نفس الكاس ..
شوفى بتحبى فى اخوك و الا باباكى ايه و قوليله نفسى تعمل كذا زى بابا ..و نفسى تعمل كذا زى أخويا حبيبى
ولو اتضايق قوليله انا بتضايق كدة بالظبط
و لو خلاص تربس و طلعت فى دماغه و عرف ان الكلمة دى بتستفزك و بيرددها عند ....
اعملى اضراب عن الطبيخ و قوليله روح كل يا حبيبى عند أمك
عزيزى الرجل ..مراتك مش هتكون زى اى حد ...لان مفيش حد شبه حد فى الدنيا دى
عزيزتى المرأة ..جوزك مش هيكون زى ابوك و لا زى اخوك و لا زى جوز عمتك
لو عايز واحدة زى ماما ..طب ماكنت قعدت جنب ماما
ولو عايزة واحد زى بابا ..طب اتجوزتِ ليه ؟
المقارنة مؤذية جدا للطرفين ..و للاولاد كمان
توقفوا تماما عن مقارنة اى حد باى حد ..لان ربنا خلقنا مختلفين ..
و مش هنعرف نكون زى حد
ليست هناك تعليقات:
إرسال تعليق