بصى يابنتى .....بصى يا حبيبتى
لو انتى مش عارفة تكونى رومانسية مع زوجك و تعبرى عن حبك بالكلمات و النظرات و اللمسات و الافعال الرومانسية الى بتدل على حبك ليه يبقى ما تطلبيش الرومانسية
و لو انتى مش عارفة تطلبى الرومانسية يبقى ماتستنيش انه يديكى رومانسية كدة من نفسه
و لو انت مصممة تنتظرى و لا تطلبى علشان مش هيبقى ليها طعم و انها لازم تيجى بتلقائية منه و ما تطلبش ....
يبقى ربنا يديكى طولة العمر خليكى مستنة لحد ما شعرك يشيب و اسنانك تقع
ولو انتى طلبتى و هو ماعملش يبقى مش مقتنع و حاسس ان دى هيافة
يبقى تطلبى تانى و تالت و رابع باساليب مختلفة و متنوعة
هو محتاج يقتنع ....خاطبى عقله ..يعنى خلى الرومانسية احتياج منطقى
زى ما انت محتاج الأكل ..انا محتاجة كلمة شكر
زى ما انت محتاج هدومك مكوية ....انا محتاجة نظرة حنية
زى ما انت محتاج نومة هنية ..انا محتاجة لمسة شاعرية
و هكذا ..يمكن ..لعل و عسى ..يفهم
و بعدين محتاج يحس ....خاطبى قلبه و مشاعره
بيبقى محتاج حملة احياء للرومانسية و الشاعرية
بالاشعار و الاغانى و الموسيقى الرسومات و الصور الرومانسية و اللمسات و الهمسات
ساعات الرجالة المنطقيين أوى بيحسوا ان المشاعر دى نقطة ضعف و هيافة و فيه منها بيعتبرها قلة قيمة
وان الراجل الخشن هو الى بتحبه الست
و بعدين محتاج يدرب ...دربى جسده و لسانه يعنى ادخلى كدة فى حضنه من غير مناسبة و بينى ليه ازاى سعادتك و انت فى حضنه
اقعدى جنبه و قوليله حسسلى كدة على شعرى و حسسيه انك سعيدة اوى بالاحساس دا
محتاج شغل كتير على قلبه و عقله و لسانه و روحه .....لحد ما تطلع روحك
مع الدعاااااااء و انتقاء ساعات الاجابة ..
فالدعاء سلاح المؤمن
والله الدعاء دا سحر ....يفعل الأفاعيل
دا ربنا سمع الست الى بتشتكى للرسول و انزل حكمه فى قرآن يتلى الى يوم القيامة
ما تهمليش الدعاء
وربنا رحيم بالضعفاء المساكين و المحتاجين الى زينا
قادر كريم يحنن قلبه عليكى فى لحظة
المهم يكون اسلوبك محبب و رقيق
هكون سعيدة اوى لما تقولى كلمة حلوة
يا سلام ياحبيبى لما تعجبك حاجة فى شكلى انك تعبر و تقول
هكون ممتنة جدا لو انت عملت كذا
و المهم كمان تكون استجابتك جميلة و مبشرة لو عمل حاجة من الى طلبتيها علشان يتشجع يكررها تانى
ليست هناك تعليقات:
إرسال تعليق