احنا ممكن نعمل تصرفات بشكل تلقائى جدا ..نقول كلمات بهزار ..لكنها ممكن تكون جارحة لشريك حياتك
مش علشان انت قصدك تهزر
والا انك مش مقتنع ان التصرف دا جارح
يبقى معناه انك تتجاهل مشاعره
انت لما تيجى تتكلم و بتشاور بايدك و تطرف عين حد جنبك بدون قصد ...بتاخد بالك بعد كدة ..مهما كان مش قصدك ..بس انت آلمته
لما تكون ماشى و تدوس على رجل حد غصب عنك ..دا مش قصدك ..بس دا لايمنع انك فرمت صباعه
انت بتهزر و تنكت على المزز و الجواز التانى ...ودا شىء جارح لمراتك ..ومهما كانت عارفة و متأكدة تماما انك بتهزر ..و مهما كانت عارفة و واثقة تماما من حبك ليها ..بس دا لايمنع انها بتتجرح ....
و انتى كمان لما تعدى تشتكى من جوزك أدام حد ...وخاصة ادام اهلك ..مهما كان مقتنع انه هزار ..و مهما كان عارف أد ايه انتى بتحبيه ..بس دا برده بيجرحه
و الجروح لما بتتكرر مهما كانت مجرد خدوش بسيطة بس خدش ورا خدش ورا خدش بتعمل جرح بجد
للاسف مع شريك الحياة مش بناخد بالنا من الحاجات الصغيرة دى ..و بنعملها تانى و تلات و رابع مع اننا عارفين انها جارحة ...دا يبقى اسمه ايه ؟
ليست هناك تعليقات:
إرسال تعليق