قالت : نحب بعضنا منذ سنين طويلة و عندما تحسنت ظروفه أهله رفضوا زواجه منى
حبيبتى
بصراحة الموضوع دا بأة كتير أوى أوى
و احيانا كتير بتكون الولد نفسه عايز يزوغ من العلاقة ..ودى حجة
او مش عايز يتجوز واحدة مشى معاها ..مش واثق فيها
يعنى كان بيتسلى ..او حبها فعلا بس مكانش ناوى يتجوزها أصلا
وممكن يكون حبها و عايز يتجوزها بس بما ان ماما الى هتجوز و هتجهز يبقى من حقها تختار كمان العروسة الى على مزاجها
و ممكن يكون بيحبها و عايز يتجوزها و امكاناته تسمح له بالاستقلال المادى بس لو خير بين اهله و حبيبته هيختار اهله طبعا
الاسباب كتير ..و النتيجة واحدة ...كسرة قلبك انت
مش عارفة ليه البنات بيعملوا كدة فى نفسهم
لو كان ناوى على جواز من الاول ..كان قال لوالدته عليكى من البداية ...و كان حكالها عنك ...و كان حببها فيكى (دا لو ذكى و بيفهم )..
وكان مهد للموضوع و عرف أهله انه مرتبط بواحدة كويسة وعايز يتجوزها فعلا
و مكانش خبى علاقته بيكى و بيبقى عايز الناس كلها تعرف انك مراته
دا الى بيحب بجد و ناوى على جواز
لو كان عمل كدة فعلا و برده اهله مش موافقين لأى سبب ...
يبقى تقطعى العلاقة و تحاولى تتناسى الامر ..انتى مش هتقدرى تعملى حاجة و يعوض عليكى ربنا
لأن حتى لو اتجوزتم ...هيبقى دايما فيه مشاكل بينك و بين أهله
لا هم قابلينك
ولا انتى قابلاهم بسبب رفضهم ليكى
و دا هيبقى بؤرة مشاكل دايما بينكم
الا لو كنتى ذكية اجتماعيا و عرفتى تكسبى حبهم و ثقتهم مهما كانت معاملتهم سيئة من البداية
ودايما بقول : لما علاقة الحب بتكون فى النور ..بمعرفة الأهل و مباركتهم ممكن تنتهى نهاية سعيدة
لكن طول ماهى فى الظلام ...غالبا بنتهى فى الظلام ...و بتكون تجربة دايما مؤلمة
ليست هناك تعليقات:
إرسال تعليق