الصحبة فى حياة المراهق أهم من ابوه و امه و عيلته كلها ..
بيبقى مرتبط اوى باصدقائه فى الفترة دى ..لانه بيبقى عايز يحس بالانتماء ..الانتماء للشلة
و حسب طبيعته ممكن يرتبط بواحد بس ...و ممكن يبقى عضو فى شلة
و بيتأثر بيهم جدا بالسلب أو بالايجاب
و دا طبيعى فى المرحلة دى
المشكلة لما تكون الصحبة فاسدة ..مع شخصية ضعيفة بينساق ليها تماما
امنح ابنك او بنتك الحرية فى اختيار اصحابه ..ماتعدش تجبره على انه يصاحب
حد انت عارف انه كويس ..لانه سيرفض محاولاتك دى
توقف تماما بتاتا عن انتقاد اصحابه و شتيمتهم و السخرية منهم ..لانك كدة كانك بتهينه هو شخصيا ...و بتخليه يتمسك بيهم اكتر
لاتحاول نك تبعده عنهم لان كل محاولاتك ستبوء بالفشل
قل له انا بحترم جدا اختيارك لاصدقائك ..
قوة شخصيتك بتعتمد على انك تقاوم اى غلط بيعملوه و كمان تسحبهم للصح مش هم الى يسحبوك للغلط ....
انا واثق من انك هتقدر تقاوم اى غلط هم بيعملوه ( امنحه الثقة فى نفسه علشان يكون اهل ليها )
كلمات قاتلة لثقته فى نفسه و هتخليه يرتمى تماما فى حضنهم اكتر و اكتر
( والله ما انت نافع طول ما انت ماشى مع الشلة دى )
(ابقى قابلنى لو فلحت )
(ابقى تعالى تف على قبرى لو شفت نجاح فى حياتك )
لما تيجى تتكلم عن اصحابه ..احترمهم ...و حاول تسمع منه اكتر ما تتكلم
على فكرة صاحبك فلان دا شكله كويس ..انت رأيك فيه ايه ؟
اسمع له باهتمام ...
بس انا ملاحظ كدة انه بيشرب سجاير ...
شوف رد فعله
على فكرة انا عرفت (من مصدر مجهول طبعا انت لا بتفتش و راه و لا حاجة ..اوعى تحسسه بكدة ) ان اصحابك بيتفرجوا على افلام و صور و كدة .
دا حقيقى ؟
اسمع و انت متحكم فى اعصابك تماما ....دا يمكن انت شخصيا بتتفرج او اتفرجت فى فترة من حياتك
تصدق الواد فلان الفلانى دا جدع ..بس انا اعرف انه مجنن ابوه منه ..تفتكر ليه ؟ اسمع رأيه
دنا واحد صاحبى النهاردة اكتشف ان ابنه بياخد مخدرات ..تفتكر بما انك فى سن ابنه ..ابوه ممكن يعمله ايه ؟..اسمع باهتمام
لو بدأت بالهجوم على اصحابه هيقفل معاك تماما
بس لو استفسرت منه كانك صديق ليه و سمعت منه بصدر رحب و باعصاب بااااااردة ...هيتكلم و دا فى حد ذاته انجاز كويس
حط فى بالك ابنك لازم هيغلط ..لازم ....ما انت فى شبابك عملت بلاوى برده
بس المهم ينفتح عليك و تحاول تكسب صداقته بحيث مايخافش يقولك انه غلط ...ولو قالك على فكرة غالبا مش هيرجع تانى للغلط ...لانه مش هيبقى عايز يفقد ثقتك فيه
ادى لابنك الثقة ..و احترم اصدقاؤه ...و لو صاحبتهم يبقى خير و بركة ..و لو اصحابه مش عاجبينك يبقى اخبط دماغك فى الحيط
تقبلهم كدة بعبلهم ...هو مش هيلاقى ملايكة على الارض
و يمكن دول أفضل الموجود حواليه
اسمع من ابنك علشان تكسب ثقته و تكسب صداقته و انفتاحه ..علشان تقدر تلحقه فى الوقت المناسب
ليست هناك تعليقات:
إرسال تعليق