البنات دلوقت أصبحت مقدمة على الزواج و كأنها مقدمة على معركة للإنتقام من جنس الرجل
هى رأت كم كان أباها ظالم لأمها .
.هى شافت كم كان أخوها مسيطر عليها و بيتحكم فيها ...
هى سمعت عن قرف الرجال و سنينهم و تحكماتهم من صديقاتها الى سبقوها للزواج
فداخلة الزواج بهدف الانتصار
حبيبتى :
الزواج ليس صراع إرادات ...و ليس مباراه فيها كسبان و خسران
و مش لازم رؤيتى و رأيى هو الى يمشى ...
و مش لازم جوزك يمشى على مزاجك علشان يكون ماشى صح
..و مش لازم تكونى مسيطرة على كل حاجة فى حياتك الزوجية
الست الى بتكون كدة بتعيش فى صراع مزمن مع زوجها فى اى قرار بيتخذوه لحياتهم
و بتنهك قواها فى معركة مالهاش لازمة
و الرجال رد فعلهم مختلف
فيه رجالة تزداد تسلط و فرض للرأى حتى لم يعد لرأيها أى قيمة و بينفذ الى هو عايزه و خلاص
و فيه رجالة بتنسحب نهائيا من الحياة الزوجية و يصبح سلبى الى حد انه بيجننها ....و لسان حاله يقول بدال عايزة تمشى كل حاجة على مزاجك ..شيلى الشيلة لوحدك .
.لحد ما بييجى وقت و الحمل يزيد عليكى و هو عايش فى ملكوت تانى لوحده تماما ..
يرمى لك الفلوس كل شهر و السلام
انت كدة تفقدين حب زوجك و مشاركته ليكى ...تفقدين شريك حياتك
حبيبتى :
لما تختلفوا فى قرار معين ...قولى رأيك من غير ما تحاولى تفرضيه عليه ...اعرضى رايك و بس ..دا بيديه فرصة انه يفكر فى رايك و ممكن يتبناه
ولو لقيتيه مصمم على رايه و انت شايفة انه غلط ...خلاص خليه ينفذه ...و هو المسئول ..ما يمكن يطلع صح
للاسف الستات بتبقى عندها قناعة ان رأيها من كرامتها ..و كونه ماخدش رايها دى اهانة و عدم احترام
حبيبتى ..رأيك ممكن يكون صح و ممكن يكون غلط ...و التجربة فقط هى الى هتثبت ذلك
و انتم فى اول حياتكم الزوجية ...بتبدأوا تاخدوا قرارات كتيرة ..فيه منها صح ..و فيه منها غلط ...بس القرارات دى بتكون خبرة ليكم انتم الاتنين ..بتساعدكم على اتخاذ قرارات مستقبلية
يعنى مش عيب انه يغلط ..سيبيه يتعلم بنفسه ...
و مش لازم رأيك الى يمشى ...لان ممكن تكونى غلطانه
مع الوقت انتوا بتكتشفوا نقاط القوة عند كل واحد فيكم .
.فبتلاقيه يسيبلك القرار فى حاجات هو شايفك تفهمى فيها أفضل ...
و انت كمان بتلاقيه دايما صائب فى حاجات معينة
و بتلاقى نفسك بتأيديه لانه متميز فى النقطة دى و بيفهم فيها أفضل منك
اكبر غلط انك تحاولى تسيطرى على الرجل ....لانك كدة بتستفزيه
فن التواصل و الحكمة ازاى تطيعيه و انت تقوديه ...
ازاى تقولى رايك و تديله حرية القرار ..
.ازاى تتفاهموا و توصلوا لحل يرضيكم انتم الاتنين ..
.ازاى تصنعى القرار و لا تتخذيه
ازاى تديله كلام ...و تخليه فى النهاية يبان ان هو الى اتخذ القرار
يارب نتعلم
ليست هناك تعليقات:
إرسال تعليق