قالت : كلامك يا دكتورة قالقنى جدا عن استحالة التغيير بعد الزواج
انا خطيبى فيه مشاكل كتير و عندى أمل انى أغيره بعد االزواج
حبيبتى :
الخطوبة فترة تعارف ..فترة اختبار
هل هنحب بعض و ألا لأ ؟
هل هنقدر نتفاهم وألا لأ ؟
هل فيه احترام بيننا و ألا لأ ؟
هل فيه ثقة بيننا و ألا لأ ؟
اطلبى ما تريدين بدون لوم متواصل و نقد متواصل
قولى له من فضلك انا مش بحب كذا أو التصرف دا بيضايقنى و تديله التصرف البديل
أنا أتمنى انك تعمل كذا لما يحصل كذا
الصراحة و الوضوح و الأسلوب الرقيق وبأكد على الأسلوب الرقيق ممكن تخليه يستجيب لو فعلا بيحبك و عايز يرضيك و بيحترم مشاعرك
انتى برده كذلك لو فيه اسلوب معين او تصرف معين هو بيضايق منه او تصرف هو نفسه انك تعمليه و انت اتغيرت علشان بتحبيه و تحترمى مشاعره
لو لقيتى فيه فعلا تغيير و التفاهم بينكم بيزيد على أساس من الاحترام و الثقة الحب ممكن يتولد و يكبر كمان
أما لو لقيتيه غير قابل للتغيير و لا يحترمك او يحترم طلباتك او مشاعرك و علطول فى خلافات فهذا نذير خطر
أحد الأفكار التى بتسبب الفشل بعد الزواج ( عندى أمل انى أغيره بعد الزواج )
الفكرة دى هتخليكى زوجة متسلطة و مستبدة كثيرة النقد و اللوم و هتعامليه كأنه طفل صغير لازم يتربى من أول و جديد ...والاسلوب دا قاتل للحب فى قلبه هو
وممكن لو ماقدرتيش تكونى كدة هتبقى دايما متضررة و متأزمة و هتعيشى مركزة على الناقص عندك و متعكننة ودى برده فكرة هتقلل حبه جوة قلبك انت
الزوج ممكن يتغير بس مش انتى الى هتغيريه
الزوج بيتغير بالدعاء اولا : فالقلوب بين اصبعين من اصابع الرحمن يقلبها كيف يشاء ..و ربنا قادر يغيره من عنده
الزوج بيتغير لو فكر بشوية عقل و فكر فى مصلحته بعيدا عن الافكار المجتمعية انا راجل و انا كدة و انا مش هتغير و لازم الست تستحمل و الكلام دا ...
لما يشغل عقله و يفكر ان سعادته مش فى انها تنفذ طلباته ....بالعكس سعادته بانه يراعى طلباتها و يحاول يسعدها ....
ولو بقت سعيدة هتعطى بلا حدود ..هى دى طبيعة الست
لما يشغل مشاعره و قلبه ...و يحس ان حبه ليها أقوى من الأنانية و العند الى جواه ...و يحاول يرضيها بقدر ما يستطيع
لما يشغل ضميره ..و يعرف ان ربنا ائتمنه على الست الى معاه دى ..و انه مسئول عن انه يشبعها مودة و رحمة و سكن ...و يرحم ألمها و ووجعها
لما يغير سلوكه علشان خاطر اولاده الى هييجوا بعده يشوفوا نموذج و مثل اعلى جيد يقتدوا بيه
لما يحس فى قراره نفسه ان نجاحه فى اسعاد اسرته هو اكبر نجاح ممكن يحققه فى حياته ....و انه مهما حقق من نجاحات فى مجالات تانية عمره ما هيحس بالسعادة طول ما اسرته غير سعيدة
حبيبتى ...انتى مش هتقدرى تغيريه ...هو الى ممكن يتغير لو اقتنع باهمية التغيير
ليست هناك تعليقات:
إرسال تعليق