قالت : ازاى اقدر اسيطر على حياتى و انا حياتى كلها بين شغلى و شغل البيت و طلبات الاولاد و ابوهم ؟
انا حاسة انى زى الجاموسة الى ماشية فى الساقية
حبيبتى :
للاسف انتى الى عاملة فى نفسك كدة بطريقة تفكيرك دى
فيه فرق بين واحدة بتروح شغلها كل يوم بتعمل نفس المهام المطلوبة منها كل يوم و بتقبض نفس المرتب كل شهر و خلاص
وواحدة تانية حاطة طموح ...عايزة تتميز فى شغلها ..عايزة تترقى ....عايزة علاوة او مكافأة او زيادة فى المرتب و بتبذل مجهود مش علشان تؤدى المهام فقط ..لأ هى عايزة تتعلم مهارات جديدة و تطور نفسها علشان تحتل موقع جديد
دى واحدة مش ماشية فى الساقية ..دى واحدة طالعة السلم ..سلم النجاح
فيه واحدة بتربى اولادها باسلوب واحد هو اسلوب الامر و النهى .افعل و لا تفعل ...ولو الاسلوب مش جايب نتيجة تقولك عملت كتير و مفيش فايدة ..
دى واحدة و لا مؤاخذه جاموسة ماشية فى الساقية
وواحدة تانية بتنوع و تطور نفسها فى وسائل التربية مع اولادها و تقرأ و تتعلم أساليب جديدة فى التأثير و بتأثر فعلا فى اولادها و حاسة ان مع تطورها ..الولاد بيتطوروا و يتحسنوا
فيه واحدة بقالها عشر سنين بتطبخ كل يوم نفس الاكل و نفس النظام
واحدة تانية حاسة انها مسئولة عن صحة اولادها ..و بتتعلم ازاى تنوع و تعمل اكلات صحية ..و تتخلى عن الطرق غير الصحية الى بتأكل بيه اسرتها و تعلفهم ...
عارفة ان الاكل مش هدف ..الاكل وسيلة لتغذية الجسم ...فبتهتم بالاكل الصحى المفيد لاسرتها و بتطور و تتعلم اكلات بناء على كدة مش بناء على طلب الجماهير
فيه واحدة علاقتها بجوزها هى نفسها بقالها خمسة خمستاشر سنة ...على نفس الوتيرة ..بيدخل حياتها الملل ..او فيه مشاكل مش بتتحل
و مش بتتكيف معاها
و فيه واحدة بتحاول تغير كتير فى نفسها ..شكلها و عقلها و مشاعرها و ايمانياتها ..بتوجد طرق للتواصل جديدة و بتدور على مايسعده و بتعمله ...بتحاول تكسب حبه اكتر و اكتر ليها
فيه واحدة سايبة نفسها خالص لبيتها و اولادها
وواحدة تانية مهتمة بنفسها و صحتها و جمالها و معتنية بعقلها و بتطوره و مهتمة بعلاقاتها و تتوصل مع الصديقات و الاهل ..بتدور على سعادتها زى ما بتدور على سعادة الى حواليها
انتى كدة بتعملى الحاجة الى انتى بتعمليها كل يوم
بس بتطورى نفسك و تتعلمى الجديد ..و بتحطى اهداف و بتسعى اليها
انتى كدة عمرك ماهتحسى انك عروسة فى مسرح العرايس
انتى هتحسى انك الفنان الى ماسك الخيوط كلها فى ايديه ...و كل الى حواليكى هم العرايس
السيطرة على حياتك ...مش معناها انك تسيطرى على كل الى حواليكى وانهم يمشوا على مزاجك
معناها انك تمشى حياتك و تقومى بالمهمات بتاعتك و تراعى نفسك وفقا لما تريديه انتى ..لا مالا يريده الآخرون
المهم تكونى عارفة ..انتى عايزة ايه بالظبط ..و عارفة ازاى توصلى ليه
ليست هناك تعليقات:
إرسال تعليق