قال : مراتى زوجة وأم ممتازة ..بس انا دايما حاسس انها مش سعيدة
أولا أشكرك جزيل الشكر على انك مهتم بكونها سعيدة و الا لأ
فنادرا ما يهتم الرجال بها الامر
هضرب لحضرتك مثال
هى مثلا بتطبخ كل يوم
بس فيه فرق بين انها تطبخ علشان انت غاصب عليها انها تطبخ و علشان ما تسمعش زورك و زعيقك و نقدك و لسانك الطويل
و بين انها تطبخ احساس بالمسئولية ..هى هتطبخ و هى عارفة ان دى حاجة مهمة ليك و لاولادك الى بيرجعوا من المدرسة جعانين ..
و بين انها تطبخ بحب ..يعنى هتطبخ لانها عارفة ان دى حاجة هتسعدك و اولادك و لم بتسعدوا انتم كمان بتسعدوها بكلمات المدح و الشكر و التقدير
الفعل واحد
لكن الدوافع مختلفة
الدافع الاول هتكون قرفانة و زهقانة و طول ما هى بتطبخ بتلعن اليوم الى اتجوزت فيه
الدافع التانى هتكون متضايقة و مجبرة بس هتحس انها أد المسئولية و بتعمله تأدية للواجب
الدافع الثالث ..هتكون سعيدة لانك حاسة انها اسعدتكم و انتوا كمان اسعدتوها بكلمات شكر او المدح
مراتك ممكن تكون ممتازة كزوجة و كأم ....بس هى غير سعيدة علشان انتوا (انت و اولادك )بتتعاملوا معها كأن دى مهمتها
محدش اهتم بيها و قال لها كلمة حلوة
محدش تعاطف معاها و هى تعبانة او مجهدة و عرض المساعدة ..او حتى قال لها بلاش طبيخ النهاردة انا هجيب اكل جاهز فى يوم كدة تريحها
محدش افتكرها بهدية فى المواسم المختلفة
محدش اهتم لما لقاها تعيسة و حزينة و قال لها تعالى افسحك و اخرجك النهاردة اجازة من المسئولية
محدش حاول يدخل على قلبها السعادة كما تدخل هى السعادة عليكم
صدقنى ..لما الست تكون سعيدة ..البيت كله بيكون سعيد
اسعدوها علشان تحسوا بالسعادة
وبنفس الطريقة اسعدي زوجك كذلك
ليست هناك تعليقات:
إرسال تعليق