اغار من أخت زوجي

لأنه طلب مني اني اكون بشكلها ووزنها..
غير تعامله معاها اللي أحسن من تعامله معايا انا وهو دائما في خلاف معى
وهو وهي متفقين دائما..
ما الحل للتخلص من غيرتي منها..وماذا افعل تجاه زوجي ؟

عزيزتى :

الاحساس بالغيرة دى ليها أسباب كتيرة جدا
ممكن تكون اسباب داخلية فيكى انتى شخصيا
و اسباب خارجية سببها زوجك

الاسباب الداخلية زى ضعف الثقة بالنفس و التوتر الدائم و الرغبة فى الاستحواذ و التملك و عدم الاحساس بالامان و الخوف المزمن من انه هيسيبنى او حبه لى هيقل

و اسباب سببها الزوج وهو عدم الاشباع العاطفى و النفسى لزوجته ومنحها الوقت الكافى
مع المقارنة الى هو بيعملها بينك و بينها و عايزك تكونى زيها

و زى ما دايما بقول المشاعر مش هنقدر نمنعها لانها بتحصل بشكل لا ارادى لكن ممكن نسيطر على تصرفاتنا و سلوكياتنا و نحكمها بالعقل

العلاقة بين الاخوات و خاصة لما يكونوا صديقين بتكون علاقة رائعة ...
لانهم نشأوا مع بعض ..تاريخهم كله مع بعض ...ليهم ذكريات كتيرة مع بعض ...ممكن تكون اسرارهم مع بعض ...ممكن يكون فيه تشابه فى الشخصيات و الاهتمامات و الميول و الطباع ...بيرتاحوا مع بعض

فلا تحرمى زوجك من علاقة جميلة زى دى لانه هو بيكون محتاج ليها ..
مش احسن ما يدور على صديقة مش اخت !!!!!!
والا احسن ما يتلم على شلة اصحاب مايعلم بيهم الا ربنا !!!!!!!
احمدى ربنا انها اخته

انتى ممكن تحطى حدود للمقارنة
يعنى فهميه ان انت و اخته مختلفين
و مقدرش اكون زيها و لا هى هتقدر تكون زيى
و المقارنة دى بتضايقنى جدا و ممكن هتخلينى اكرهها
فمن فضلك لا تضعنى فى مقارنة مع حد ..علشان انا مش زى حد

حاولى تطورى سبل التفاهم مع زوجك ....علشان يحب يتكلم معاك حتى لو ليكى اراء مختلفة
يعنى احترمى الاختلاف بدون ان يصل الى خلاف
اتعلمى انك تسمعى اكتر ما تتكلمى
ودى محتاجة تتعلمى فيها اساليب الحوار الفعال

مش لازم نكون شبه بعض فى اراءنا و افكارنا علشان نكون قريبين من بعض ..المهم نتعلم ازاى نختلف مع الاحترام

زوجك ليس ملكا لك
و من حقه يكون ليه علاقات قوية بغيرك
انتى كمان لازم يكون ليكى صديقات او اخوات مقربين يشاركوك افكارك و ارائك ..علاقتك بيهم قوية و متينة ..دورى عليهم و ابنى العلاقات دى و خليها من اهدافك
دا يكسبك الثقة فى نفسك و انك أهل للحب و الثقة
و بيقلل الرغبة فى السيطرة و الاستحواذ عليه بعلاقة متينة تستمتعى معها ايضا

ابنى نفسك ..وطورى فيها دايما و حطى اهداف و حاولى تحققيها
و غيرى شكلك و جددى فيه ..مش لازم يكون شبه اخته ..
لان ممكن ذوقها غير ذوقك ..ممكن طبيعة جسمها غير طبيعتك ...ممكن لبسها ما يلقش عليكى ...مش لازم تكونى شبه حد ..
المهم تكونى حاسة انك جميلة بينك و بين نفسك