مشكلة بشعة تؤرق الوالدين و احد اسباب النكد الاسرى المزمن ...مذاكرة الاولاد
وهذه بعض القواعد التى تعلمتها و طبقتها مع اولادى و أتت بنتائج جيدة بفضل الله
من بداية الحضانة
-ماتعوديش ابنك انك لازم تعدى معاه و تتفرغى ليه علشان يعمل الواجبات ...لانه بيتعود على كدة انه مش هيذاكر الا لما تتفرغى و تعدى معاه
- اتفقى معاه هنذاكر شوية و نلعب شوية :
مثلا الواجب عربى و حساب اديله واجب مثلا العربى ...و قوليله بالظبط هيعمله ازاى ...و سيبيه ماتعديش معاه ...و قوليله هنلعب بعد ما نخلص ...و كونى حازمة فى هذا الامر ...مفيش لعب الا بعد انتهاء واجب العربى ...هيعد يبرم و يتحرك و يشغل نفسه بحاجات ...قوليله انت كدة بتضيع وقت اللعب ...خلص المطلوب و بعدين العب ...شجعيه انك لو خلصت بسرعة و باتقان ...هتلعب اكتر ..لكن هتعمله اى كلام هنعيده تانى ...هنعد ندلع هياخد وقت كبير و مش هتلعب
لو خلص الواجب ....شجعى و حفزى و قولى برافو و هايل و شاطر و سقفيله ...
الطفل يحب العمل لما يتشجع عليه لكن هتعدى تقولى الحروف مش مضبوطة و معووجة و السطر نازل و تطلعى فى الى عمله القطط الفاطسة ...
انت كدة بتكرهيه فى المذاكرة وبتحسسيه بالفشل و بعدين تشتكى ان الولد بيكره المذاكرة وانت السبب
الطفل فى السن دا مش مطلوب منه الاتقان ...الاتقان هييجى بالتدريج و التدريب مش بالصراخ و لا بالشتيمة و الضرب
لما يخلص ...العبى معاه شوية او خليه يلعب حاجة بيحبها لمدة محددة ....قوليله لحد ما عقرب الكبير (فى الساعة ) ييجى على كذا
انت كدة بتعلميه احترام الوقت و كل عمل و له وقته
لما ييجى الموعد خليه يبدأ الواجب الى بعده
القاعدة : اجعلى وقت المذاكرة وقت محبب للطفل فى السن دا
لو كره المذاكرة هيعد كارهها طول عمره
لو ارتبط فى ذهن الطفل ان هذا الوقت هو وقت الزعيق و الشتيمة و الضرب و قلة المزاج وعدم اللعب يبقى هيحبها ازاى؟
لكن لو ارتبط بانه مهمة محببة ماما فيها بتساعدنى و تضحك فى وشى و تشجعنى و تحضنى و تبوسنى و تلعب معايا هيحس ان الوقت دا وقت لذيذ محبب ليه
الامر يعتمد على صبرك و طولة بالك
ليست هناك تعليقات:
إرسال تعليق