قالت : جوزى طول النهار يزعق فى ..و يزعق فى ابنه ...مع العلم هو مش عصبى
و لما قلت له انت ليه بتزعق ...انت ممكن تقول الى انت عايزه بصوت واطى
قال لى ..لازم ازعق علشان تحترمينى و ما تركبنيش و تفرضى رأيك على
و لازم أزعق فى الولد علشان يخاف منى و يحترم كلمتى
للأسف دا تفكير الكثير من الرجال فى مجتمعنا المتخلف ...خدوهم بالصوت لايغلبوكم
اولا : فكرة ان الزواج معركة واحد فيها لازم يفرض رأيه على التانى فكرة متخلفة ...الزواج شركة لازم الاتنين يتفقوا فيها مع بعض علشان يوصلوا لقرار صائب اى كان هذا القرار رأى مين
لاتبحث عن الفوز ..ابحث عن القرار الصائب الى فى صالح الاسرة مش فى صالحك لوحدك ..ابحث عن سعادتكم انتم الاتنين
ثانيا : فكرة ان الصوت العالى يعنى قوة الشخصية ..
الصوت العالى دليل على ضعف الشخصية ..ضعف العقل .. و ضعف المشاعر و ضعف قدرة على التعبير عن نفسه
ماتلاقيش انسان حكيم و عقليته ناضجة صوته عالى ابدا
الانسان الى بيفرض شخصيته بعقله و تفكيره مش محتاج صوت عالى ..و هو دا الانسان القوى
ثالثا : فكرة انهم يسمعوا الكلام بدافع الخوف دى فكرة تؤدى الى ابناء ضعيفى الشخصية ..
و هتلاقيه هو نفسه كان ابوه كدة معاه و علشان كدة طلع ضعيف الشخصية
الطاعة الناتجة عن الحب و الاحترام اقوى من الطاعة بسبب الخوف
لو ابنك خايف منك ممكن يعمل الغلط من غير ما تعرفه بعيد عنك
لكن لو ابنك بيحترمك هيقتنع ان دا غلط و مش هيعمله سواء ادامك او من وراك
و لو ابنك بيحبك كمان مع الاحترام هيقتدى بيك و هتكون مثل أعلى ليه
رابعا : فكرة ان الست بتركب الراجل الى صوته واطى و تفرض رأيها عليه
الست بتركب الراجل الضعيف الشخصية ....الضعيف فى عقله و تفكيره ...الى مش عارف دايما يتخذ قرار فى حياته ..الى مبيعرفش يحل مشكلاته ..
لكن هتحترم الراجل القوى فى عقله ...و هتحب القوى فى مشاعر الحب و الرحمة و الحنية
و يوم الست ماتحترم و تحب ....بتذوب فيه و فى هواه و بتحاول ترضيه لأقصى درجة ..دى لو ست سوية
غير طبعا الستات المتسلطة العنيدة الى هى برده بتحاول تدارى ضعفها بالعند و التسلط
اعزائى :
الصوت العالى للرجل و المرأة ممكن يدارى ضعف عقلك و ضعف شخصيتك
لكن مش ممكن يزرع احترام فى قلب افراد اسرتك
ممكن يخافوا منك تجنبا لزورك ...بس مش ممكن هيحترموك ولا هيحبوك
والاحترام غير الخوف
الخوف هيكونوا زى القطط أدامك ..بس بيلعنوا سلسفيل جدودك من وراك ...تعالوا اسمعوا المراهقين بيقولوا ايه على آباءهم و امهاتهم
الاحترام هيكونوا براحتهم جدا أدامك ...و من وراك هيذكروك بكل الخير
فارق كبير بينهما
ليست هناك تعليقات:
إرسال تعليق