أعلم انى غيورة و شكاكة من كتر ما بشوف و بسمع عن خيانات الرجل
فماذا أفعل ؟
عزيزتى
المشاعر مش هنقدر نمنعها ...لكن نقدر نسيطر على تصرفاتنا حيالها
مفيش زوجة أو زوج مش هيحس بالغيرة و يمكن ينتابه الشك من تصرفات شريك حياته فى بعض الاحيان
لكن احنا ممكن نتحكم فى تصرفاتنا حيال ذلك
زى مشاعر الغضب
مش هنقدر نمنعها لانها بتحصل غصب عننا
بس نقدر نتحكم فى تصرفاتنا و كلامنا ساعة الغضب
مش هقدر اقولك لا تشكى و لا تغيرى
بس بلاش تعبرى لزوجك عن شكك او غيرتك كلما حسيتى بيها
بلاش شغل المحقق كونان و التدوير وراه ..لانك طالما بتدورى على دليل لن تعدمى اى دليل حتى لو كانت مكالمة عابرة او رسالة عادية و هتحسى علطول انها دليل ادانة تثبت شكوكك
بلاش شغل الانفجار فيه
حتى لو لقيتى حاجة تحكمى فى اعصابك و عقلى نفسك و اسأليها هل فعلا ما رأيته يستحق الشك ؟
من حقك تغيرى حتى ولو من مكالمة غلط
لكن مش من حقك تعكننى عليه حياته و تحاسبيه على النظرة و اللفتة و الكلمة
تعاملى مع مشاعرك بينك و بين نفسك
و هدى نفسك بينك و بين نفسك
و لو عايزة تفضفضى مع حد عاقل فضفضى علشان يهديكى و يعقلك
واشغلى دايما تفكيرك بحاجة مفيدة على أد ماتقدرى
و ماتفكريش فى كل صغيرة و كبيرة
و ما تدوريش وراه
حاولى تجاهدى نفسك
ولو مش قادرة الجئى لأخصائى نفسى قبل ما تهدمى حياتك
والكلام للرجال أيضا
بس الرجال بيفرضوا ممنوعات كتير على زوجاتهم
ما تخرجيش ..
ما تلبسيش ..
ما تتكلميش ..
ما تتفرجيش ..
بيخنقوهم بالفعل و ممكن توصل ان الزوجة يجيلها اكتئاب مرضى
مش هتقدر تتحكم فى مشاعرك ..
بس لازم تتحكم فى تصرفاتك حتى لا تخنق شريك حياتك
ليست هناك تعليقات:
إرسال تعليق