الرجل الحقيقى رجل طموح يسعى الى تحسين حياته و تطوير نفسه بشكل متواصل
و مع الزمن بيكبر و يعلى أدبيا و ماديا مع الزياده فى عمر الاسرة و الزيادة فى طلباتها
للأسف تربيتنا لأبنائنا تفقدهم الثقة فى أنفسهم و تجعلهم يشعرون دوما انهم مش فالحين و مش نافعين فى حاجة ابدا
دوام النقد و السخرية و الاستهزاء و الاهانة يشعر الطفل انه انسان قبيح مكروه مش نافع فى حاجة ابدا
لا دراسة نافع و لا رياضة نافع و نسمعه كلام امثال
و الله ما انت فالح
ابقى قابلنى لو فلحت
و نفضل فوق دماغه لحد ما يفقد تقديره لذاته و يعتقد تماما انه غبى و لن يفلح فى شىء ولا يملك اى مقومات تؤهله للنجاح
يكمل تعليمه بالعافية
ييجى فى ثانوى ملوش اى طموح و ينجح برده بالعافية
و يدخل الكلية ينجح سنة و يسقط سنة
يلاقوله شغل مش فالح فيه و لا بيثبت فى شغلانة ابدا
اهله يجوزوه يفشل فى جوازه ايضا
و ممكن يحاول يجرب اى حاجة غلط علشان يحس بانه نافع فى حاجة
يجرب يدخن
يجرب يشرب مخدرات و يفتخر بين اقرانه بيها و انه متميز بكدة
يضحك على البنات و يفتخر بان البنات بتموت فيه و بتجرى وراه لاقناع نفسه بقيمته و انه نافع فى حاجة
و يدخل فى دائرة مفرغة من فقدان احساسه بقيمته يؤدى الى فشله فيزيد احساسه
عزيزى الاب ...عزيزتى الام
أفضل خدمة ممكن تقدموها لأولادكم انكم تكتشفوا مواطن التميز عندهم
و انكم تتبنوا احلامهم هم و ليس احلامكم انتم
و تساعدوهم على تحقيقها بكل ما اوتيتم من قوة
الطفل فى امس الحاجة انه ينجح فى حاجة علشان يحس بالثقة فى نفسه و بانه قادر على النجاح
الذكاء أنواع
و مش علشان هو مش شاطر فى الدراسة هيفشل فى حياته
فيه كتير لم ينجحوا فى دراستهم و نجحوا علميا او فى التجارة أو ادارة الاعمال
اكتشف طفلك و دايما امدح فيه نقاط التميز
فان كثرة النقد و السخرية و الاهانة يزيد المشكلة و لا يحلها
ليست هناك تعليقات:
إرسال تعليق