الراجل الحقيقى تصرفاته و سلوكياته نابعة من المبادىء الراسخة فى ضميره ووجدانه
عنده مبادىء لايحيد عنها ...و ان اخطأ فانه سرعان مايعود الى مبادئه و ضميره ..يصلح ما أفسده ..و ينتهى عنه
نخطىء كثيرا مع ابنائنا عندما نقيم تصرفاتهم بشكل دائم ..هذا صواب و هذا خطأ ...دا ينفع و دا ماينفعش....كدة غلط و كدة صح ...دون ربطها بالمبدأ ..دون وضع قواعد و ثوابت و أساس
فبناء الشخصية زى بناء البيت ..محتاج ثوابت قوية علشان يتبنى عليها بقية الشخصية
قد يكون الاب و الام نفسهم معندهمش مبادىء راسخة ..فتصرفاتهم متقلبة حسب المصلحة ...دلوقت دا غلط ..و بعد كدة صح ...حسب الموقف
وقد تكون متقلبة حسب المزاج ...لو مزاجهم حلو يتساهلوا و لو مزاجهم وحش يتشددوا
وقد يختلفوا هم الاتنين فى هذه المبادىء هى شايفة ان تصرف الابن صح و هو شايف ان تصرفه غلط
و قد يختلفوا مع الطفل .انت ماتعملش كدة و كدة غلط ...لكن لما نعمله احنا الكبار عادى
كل هذه الأمور تهز الثوابت عند الطفل ...و تجعله لايعلم بالظبط الصح من الغلط ...لان الاب و الام متقلبين او مختلفين ....و لا ترسخ مبدأ عند الطفل
المبادىء لازم كلنا نجمع على انها غلط ....و الاباء يمشوا عليها قبل الابناء ...ماينفعش واحد يمشى عليها و التانى لأ
لما نقول له : لازم تنام بدرى ..يبقى الكل لازم ينام بدرى ...مايبقاش هو داخل ينام و ابوه سهران
ممنوع البيبسى و الشيبسى علشان اسنانك و صحتك وهى طول النهار تاكل و تشرب فيهم
لما نقول له : ماتطلعش اسرار البيت ..يبقى ماتعديش تحكى ادامه اسرار بيتك لامك و صديقتك
لما نقول له لازم نقول الصدق حتى ولو كنا غلطانين ..يبقى ماتقوليلوش ماتقلش لبابا اننا عملنا كذا
لما تعلميه يصون الامانة يبقى ماتحاوليش تعرفى سر صديقه و قوليله ماينفعش تفشى سره ...لو عايز تحكيلى قل لى من غير ما تقول مين ..لو عايز تستشيرنى
لما تقولى للبنت لازم ترجعى بدرى ..يبقى لازم الكل يرجع بدرى حتى الاولاد
القواعد لابد ان تسرى على الكبير و الصغير ..الولد و البنت ..علشان تكون عادلة و تكتسب احترام الاطفال
لكن هتكتبى على سطر و تسيبى أسطر ...
هتعدى تتعبى نفسك كتير أوى فى الجدال و النقاش و إن استجابوا و هم صغيرين ..هيتمردوا أول ما يبدأوا فى سن المراهقة ....لان القاعدة مخلخلة
و الاساس المخلخل لايبنى شخصيات قوية
ليست هناك تعليقات:
إرسال تعليق