دى احد نظريات الزواج المنتشرة فى مجتمعنا دون مراعاة للتغيرات المجتمعية الى حصلت فيه
زمان كان الجواز بطيخة لان العادات و التقاليد كانت لاتسمح ان العريس يعد مع خطيبته و يمكن لاتسمح انه يشوفها الا ليلة الزواج
فكان فعلا الزواج بطيخة
زمان مكانش فيه الاختلاط الى احنا فيه دا ..هو مش بيشوف الا مراته و هى مش بتشوف الا جوزها فكانوا راضيين ببعض
دلوقت الدنيا اتغيرت
و الاختلاط اصبح فى كل مكان
يعنى لو زمايل فى كلية او شغل اهم شايفين بعض و عارفين اخلاق بعض و طباع بعض
و سائل التواصل فتحت الباب على مصراعيه للتواصل اليومى حتى لو مش هيشوفوا بعض
الخطوبة بتعد بالتلات و اربع سنين
يعنى دا يمنع تماما ان الجواز يكون بطيخة
و الشباب و البنات طول النهار يتفرجوا على افلام و مسلسلات ويسمعوا اغانى وفيديوهات و عايزين يحسوا بالحب
كل واحد فيكم بيختار على بينة و المفروض يكون فاهم و عارف الى ادامه كويس جدا قبل الزواج
بس هى المشكلة الكبرى بتكون فى الجهل
هو عارف ان فيها العيب الفلانى ...و بيقول لنفسه انه هيغيرها بعد الجواز ..و دا اكبر غلط
و هى عارفة ان فيه الطبع الفلانى ...و عايشة على امل انه يتغير بعد الجواز
دا غلط
الصح انك تتعلم ازاى تتعامل مع الطبع دا
ازاى تحتويه بحيث تقلل اضراره
ازاى تتصرف فى المواقف الى بتظهره
عيب اوى فى عصر الانفتاح على البحرى الى احنا عايشين فيه دا و لسة بنقول الجواز زى البطيخة
أيوة كان بطيخة زمان ...بس دلوقت لأ
ومش معنى كدة انى بشجع علاقات الحب ماقبل الزواج ..و انهم يمشوا مع بعض فترات طويلة فى الظلام
انا بشجع اكتر الخطوبة الرسمية الطويلة ...بحيث العلاقة تكون فى النور و بمعرفة الاهل و الاصدقاء
و بشجع ان الخطوبة ماتكونش ليها تكاليف مادية كبيرة ...يعنى كفاية اوى دبلتين ..علشان يكون سهل انهم ينفصلوا لو محصلش اقتناع او حب
انا شخصيا بقول لبناتى
انا عندى انك تتخطبى خمس ست مرات و تفركشى
اى حد تحسى بتقارب معاه ييجى يتقدم و لن نطالبه باى شىء
افضل من انك تحبى فى السر
الخطوبة فترة تعارف ...يا اما تبين لك ان اختيارك صحيح ....فنكمل الجواز
او تبين ان الاختيار غلط ..فمش هنكمل
ياعالم اخطبوا المحبين لبعض و خلى علاقتهم فى النور ادام عينيكم ...
ولا تكلفوا الخطيب اى حاجة علشان مايحسش انه مضغوط ولازم يكون جاهز
ومش اول ما يتخطبوا تبدءوا فى تجهيز البيت
خلوا العلاقة فى النور و ادوها وقتها قبل ما يقرروا انهم هيتجوزوا
ماتبدأوش الجهاز الا لما تحسوا انهم خلاص عايزين يتجوزوا
دا جواز مش بطيخ
ليست هناك تعليقات:
إرسال تعليق