الطفل الى والده او والدته طول النهار يوعدوه بحاجات مش بيعملوها
اقعد شاطر و انا هوديك الملاهى
اعمل الواجب و انا هجيب لك حاجة حلوة
نام علشان هجيبلك لعبة حلوة
او يهددوه بحاجات برده مش بيعملوها
لو عملت كدة هضربك
لو قلت كذا تانى مش هوديك النادى
لو مامعلتش كذا مش هجيبلك كذا
الاب أو الام دى خلاص تفقد مصداقيتها عند طفلها و عمره ما هيصدقها فى اى حاجة بعد كدة و التهديد و الوعود تفقد فاعليتها تماما
يعنى مهما قعدت تحاول تقنعه بجدوى اى حاجة انها لازم تتعمل ...او ان كذا غلط وغلط اننا نعمله ..خلاص هو فقد ثقته فى كلامها
حتى ممكن تلاقيه يسمع كلام اى حد تانى من اصحابه او قرايبه فى اى معلومه تتقال ليه و معدش يصدق كلامها
و ياسلام كمان لما يسمعها و هى بتكذب و تحكى حاجات ماحصلتش لصاحبتها او مامتها
و خاصة انه قاعد معاها طول الوقت و شايف
او انها تحكى مواقف حصلت أدامه و تزود و تنقص و تحكى الموقف على مزاجها
او انه يسألها سؤال و ترد عليه بأى كلام يكتشف بعد كدة انه غلط
و العملية تضرب نهائى تماما لما تتفق معاه على الكذب ..
لما ييجى بابا هنقوله كذا و مش هنقوله كذا
او هتقول للمس انا كنت تعبان و ماعملتش الواجب
انتى كدة مش بتفقدى احترامه و تصديقه لكلامك بس
دا انتى كمان بتعلميه ازاى يكذب و يخبى و يدارى و يتهرب من تقصيره و اخطاؤه بالكذب و الخداع
و لما بيكبر و يدخل سن المراهقة بتفقدى القدرة على اقناعه نهائى باى حاجة ...و تفقدى احترامه لاى كلمة بتقوليها
و تلاقى الابن عنيد و ماشى بدماغه و معدش بيحترم اى كلمة منك
كلمة ان اولادنا هم الى بيربونا كلمة فعلا صحيحة ..
لازم تتربى انت الاول علشان تعرف تربى اولادك ..
و لازم تكون كلمتك صادقة علشان تكون محترمة و مقدرة بعد كدة
ليست هناك تعليقات:
إرسال تعليق