من الحاجات الى بتزود الثقة فى النفس انك تكون فاهم نفسك كويس و عارف انت عايز ايه ؟
كل الناس الى حواليك متوقعين منك حاجات معينة
والديك و اخواتك
اصحابك و زملاءك
شريك حياتك و اولادك
لو انت مشيت حياتك وفقا للى هم عايزينه مع الوقت هتفقد الثقة فى نفسك تماما
و هتلاقى نفسك كل حياتك ماشية فى محاولة ارضائهم دون نفسك
و ياسلام لما تتعارض الارادات و ماما عايزة منى كذا و زوجى عايز منى كذا المخالف ليها تماما
او ابنى عنده امتحان و عايزنى اقعد معاه لكن جارتى الى بحبها منتظرة منى انى اساعدها فى عزومة النهاردة
و صحبتى الى عايزانى انزل معاها السوق و زوجى الى عايزنى اروح لمامته العيانة
بتلاقى نفسك عامل زى العروسة فى مسرح العرايس الى بتتحرك حسب الى ماسك الخيط
و يا سلام لو كل واحد بيشد فى اتجاه مختلف
اوقف كل توقعات الناس الى فى ذهنك و اسأل نفسك انا عايز اعمل ايه
؟
ماتعدش طول النهار تقول اصل والدتى عايزانى اعمل كذا و مديرى عايزنى اعمل كذا و مراتى عايزانى اعمل كذا
طب و انت شخصيا عايز تعمل ايه ؟
ماتعديش تقولى بابا عايز كذا و جوزى عايز كذا و صحبتى عايزة كذا
اسألى نفسك انا عايزة اعمل ايه ؟
محدش هيقدر يرضى كل الناس
اعتذر بلطف عن انك مش هتقدر تكون عند ظنهم و توقعاتهم دايما و ابدا
واوعى تكذب و تتحجج بحجج كاذبة ...قل لهم انا مش عايز اعمل كذا
او انا معلش مش هقدر اعمل كذا بمنتهى الظرف و اللطف
خلى عندك القدرة على ان تقول لأ بذوق و ادب ..لو انت مش مقتنع بالحاجة و مش عايز تعملها
انا عارف انك عايزنى اعمل كذا لكن سامحنى مش هقدر اعمله و انا اسف
لو استمريت على كدة غالبا الناس هتتعود على كدة خلاص انك مش دايما تحت امرهم
و انك بتعمل لما تكون عايز تعمل
و ممكن كمان تلاقى نفسك مع الوقت بتعمل ليهم حاجات كتير يمكن اكتر من الاول بس مش علشان هم الى عايزين لانك انت الى عايز تعمل
ليست هناك تعليقات:
إرسال تعليق