من الحاجات الى بتساعد على تقوية الثقة بالنفس
انك تكون عارف نقاط القوة عندك و ايه المواقف الى انت قادر تحقق فيها نجاح
و تكون عارف نقاط الضعف وايه المواقف الى انت دايما تفشل فيها
المعرفة دى بتخليك :
اولا : تعمل على تقوية نقاط الضعف عندك لو حاجة ممكن تتطور بالمعرفة و التدريب
ثانيا : هتحاول تتجنب المواقف الى دايما انت بتفشل فيها بسبب ضعف امكانياتك بقدر الامكان
ثالثا : هتوكل حد يعمل لك الحاجة دى او هتستعين او تستشير حد شاطر فى الموضوع دا علشان يدلك على الطريقة الصحيحة
مفيش انسان كامل
و كل انسان عنده نقاط ضعف و نقاط قوة
يعنى انا مثلا بالرغم ان احدى نقاط قوتى هى قدرتى على التواصل مع الناس و الاقناع و التأثير بفضل الله تعالى اولا و اخيرا
لكن بحس بالفشل الذريع فى التعامل مع موظفين الحكومة المصرية فى المصالح الحكومية
بالرغم من انى أتأنى جدا فى تفكيرى و قراراتى و الحمد لله عمرى ما ندمت على قرار أخدته
و لكنى احيانا افتقد القدرة على القرار السريع فى وقت الطوارئ و الحوادث و المصايب المفاجئة
مش عيب انك يكون فيك عيب
العيب انك تقاوح مع نفسك و تكون فاكر انك بتفهم فى كل حاجة و تقع فى فشل بعد فشل لحد ما تفقد الثقة فى نفسك
العيب انك لاتعترف بنقطة ضعفك و لا تستشير و لا تطور ولا حتى تشوف حد تانى بيفهم يعملها
الثقة فى نفسك مش انك تكون فاكر انك كامل الاوصاف
الثقة فى النفس انك تكون عارف نقاط قوتك لان دى مواطن النجاح فى حياتك
و تكون عارف نقاط الضعف الى ممكن توقعك فى الفشل لتحاول تجنب هذا الفشل فى المواقف المختلفة
ليست هناك تعليقات:
إرسال تعليق