قالت : هل فيه حل لانهاء الصراع بين الابناء و اخليهم يحبوا بعض ؟
الصراع بين الابناء ضرورة
اى اتنين مهما كانوا بيحبوا بعض و بيموتوا فى بعض و عايشين مع بعض لازم هيتخانقوا ..
بدليل انك بتتخانقى مع جوزك ..و كنتى فى بيت اهلك بتتخانقى مع اخواتك ومع والديك ..و كنتى بتتخانقى مع اصحابك
طالما طلعت برة الحمام يبقى لابد من الصراع
فاولا هدى اعصابك و اعتبرى ان دى ضرورة نفسية و اجتماعية
تربويا العلماء بيقولوا لا تتدخل ابدا فى الصراع بينهم ..الا لو وصل للأذى البدنى الشديد
لان تدخلك هيحسسهم علطول انك ظالم
ولانهم لما بيحكوا مش بيقولوا الحقيقة كلها ..هم بيحكوا الى الطرف التانى عمله و مش بيحكوا الى هم عملوه ..
و فى النهاية هم الاتنين بيبقوا غلطانين
ولو جيت على واحد فيهم هيحس انك ظالم علطول
وياسلام لو طفل مفترى و الا كبير و طفل ضعيف و انت بتيجى على المفترى علطول ..فبيحس بالاضطهاد وانك مش بتحبه
فيه قاعدة تربوية بتقول لا تنصب نفسك قاضيا ...قاضى العيال انتحر
الصراعات ممكن استفيد منها بانى اعلمهم ازاى يتعاملوا مع الاختلافات بينهم و بين الاخرين و بدون ما تنصب نفسك قاضى
يعنى اقترح عليهم وسائل لتحسين التواصل و انصحهم بيها بينى و بينهم
يعنى باقعد مع كل واحد فيهم لوحده - بعد مايهدوا خالص - و اقوله انت غلطان انك عملت كذا و كان ممكن تعمل كذا ..
فانا بعلمه الوسيلة البديلة لتحسين التواصل
انا لاحظت انك اخدت من اخوك الحاجة الفلانية بالعافية ...فهل دا صح ؟
اسمع ليه ....
و احاول اقنعه ان اخد الحاجة بالعافية دا اسلوب غلط الا لو بتاعتك انت بس
هل انت ترضى انك تكون قاعد على اللاب و اخده منك مرة واحدة كدة و بالعافية ؟
انت كان ممكن تستأذنه بالادب
كان ممكن تنتظر لحد ما يسيبها
كان ممكن تنظم الوقت بينكم (لو كبار شوية ) انت تاخدها فترة و هو ياخدها فترة
و تروحى للتانى (بعد ما يهدأ ) و تقوليله ان ماينفعش تفضل الحاجة معاك طول الوقت
و انك لازم تعمل حسابك ان اخوك محتاجها برده
المهم هنحاول نعلمهم ازاى التصرف البديل
و طبعا مش مجرد ماهنتكلم كدة المشكلة هتتحل
دى عايزة مرة و اتنين و تلاتة و عشرة ..لحد ما مخهم يكبر و يستوعب و يتبرمج ان فيه حلول للمشكلات غير الصراع و الخناق ...
دا لو احنا مقتنعين برده بكدة
اديهم حلول عادلة .....و بكرر عاااااااادلة ....و بأكد عليها كمان
و بلاش شغل اخوك الصغير و لازم تيجى على نفسك علشانه ..
دا اسلوب خاطىء تماما ..
هيخلى الكبير يكره نفسه انه بأة كبير و يفترى و ممكن يكره الصغير كمان ..
و يخلى الصغير يبلطج اكتر و يحس ان طبيعى الكبار لازم يتنازلوا علشان خاطرى
العدل عدل ..حتى بين الكبير و الصغير
بلاش اسلوب دا ولد و انتى بنت ..العدل بيقول انهم سواسية
مش علشان هو ولد ممكن يضرب و يشتم و يقل أدبه و يرمى حاجاته ....
و بعدين نشتكى منهم لما يكبروا و يتجوزوا و احنا الى علمناه انه ممكن يبلطج علشان هو راجل و عادى الغلط منه مقبول
اعدلوا فى بيوتكم علشان ربنا يرزقكم العدل فى بلادكم
الصراع ضرورة
المهم نستفيد منه اننا نعلمهم البحث عن حلول لمشاكلهم بدل الخناق و الصراخ و الضرب
و نعلمهم العدل ...زى مابدور على حقوقى ..احترم حقوق الناس
و بعدين نعلمهم الفضل :
و ازاى انه يحب اخوه و يتعلم العطاء ليه
ازاى يساعده و يكون مسئول عنه ..
ازاى يجيب له حاجة حلوة و يقتسمها معاه ...
ازاى يتنازل (بارادته مش بالاكراه منك ) لو حاسس ان اخوه محتاج الموضوع دا اوى ..
ازاى يعبر عن حبه بالقبلة و الحضن و الكلمة الحلوة والهدية و التعاطف
انتى كدة بتعلميهم ازاى يحبوا بعض و يعبروا لبعض عن حبهم حتى لو مختلفين عن بعض ...
علشان يعرفوا يحبوا ازواجهم لما يكبروا
ليست هناك تعليقات:
إرسال تعليق