قالت : انا مخطوبة وبحبه وهو كمان بس هو من النوع اللى مبيتكلمش كتير او مش على الفاضى والمليان
بس هو قليل اوى انه يحكى لى على حاجة أو يتكلم عن اليوم كان ازاى
وانا بقوله انه يتكلم يحكي لى بس هو فى العادى يعنى ساعات بيقول حاجات وساعات لا وفى بعض الاوقات مبعرفش اقول ايه
حبيبتى :
بصفة عامة الرجال مختلفين عن النساء فى موضوع الكلام (فى الفاضية و المليانة )
الرجال بصفة عامة كلامهم أقل
و لما بيتكلم بيبقى المختصر المفيد لنقل معلومات و ليس للدردشة
ومايحكيش الا الحاجة الجديدة
الست ممكن تحكى يومها عملت ايه ..مع إن كل الايام زى بعض ..بس كل يوم تحكى برده نفس الحدوتة
لكن الراجل طالما مفيش حاجة جديدة مش هيحكى
فيه راجل طبعه صامت يعنى مش بيتكلم أصلا كتير معاك أو مع غيرك ..و دا بيبقى شخصية هادية محتاج يثق فيكى جدا علشان يقدر ينفتح
و فيه راجل بيرغى بس بيستهلك كل طاقة الكلام فى شغله و خاصة لو شغله فيه تعامل مع عملاء أو فيه كلام كتير زى المدرس مثلا
و فيه راجل بيستهلك طاقة الكلام مع اصدقائه و بيحب يتكلم معاهم اكتر لأنهم بيفهموه اكتر و فيه مواضيع مشتركة ممكن يتكلموا فيها
المرأة لو وقعت فى مشكلة او حاجة ضايقتها تعد تحكيها فضفضة وبترتاح اكتر لما تحكيها لكن الراجل غالبا لا يحكى ما يضايقه الا لو محتاج استشارة
المفروض انتم فى فترة الخطوبة بتتعرفوا على بعض..
الهدف هو التعارف و التخطيط للمستقبل
ممكن تفتحى معاه موضوعات كتيرة جدا علشان تعرفى أفكاره و آراؤه و عاداته ...بس دا يعتمد على ثقافتك اكيد انت
و ابدئى بنفسك يعنى مثلا احكيله عن تاريخ طفولتك
التاريخ الشخصى دا مهم لمعرفة العوامل الى أثرت فى تكوين شخصيته
مين اكتر حد أثر فيك
وايه المواقف التى لاتنسى فى مدرستك وكليتك و حياتك بصفة عامة
احكيله و بعدين اسأليه انه يحكى زيك و ما تسبهوش بدون اسئلة توضيحية لانه هيقول الحكاية مختصرة جدا (كنت صغير و كبرت )
اسأليه عن والده ووالدته و تأثيرهم عليه ..اخواته ..اصحابه ..مدرسيه ...كليته ...شغله ..رياضة كان بيمارسها ...هواية كان بيحبها ...دراسة كان نفسه يدرسها
و اسأليه على التفاصيل لأنه مش هيتبرع انه يقولها الا لما تسأليه
المفروض تتكلموا عن أفكاركم الدينية و السياسية و الاجتماعية و الاقتصادية
لو فيه أفكار اصلا
اتكلموا عن فكرته عن الزواج وليه بيتجوز و ايه الى بيتمناه فى مستقبله سواء فى بيته او فى عمله او فى زوجته و اتكلمى انت كمان
اتكلموا عن رأيه فى المرأة و افكاره عنها كزوجة و أم أو كموظفة زميلة لان دا هيحدد علاقته بيكى هتكون ازاى بعد كدة
وانت بادرى بالسؤال ...ما تعديش كدة مستنية هو يفتح مواضيع ...
افتحى انت
بوستات الزواج الى هنا فى الصفحة اطرحى افكارها و شوفى رأيه فيها ايه
و حياة أغلى حاجة عندك ما تعديش تقولى الدكتورة بتقول علشان دى حاجة بتجنن الرجالة
اطرحى الموضوع بدون اشارات لحد و اسمعى رأيه
لو حصلت مشاكل زى الى بتحصل بين المتزوجين ...اطرحيها و قوليله انا قريت النهاردة عن المشكلة دى ..ازاى نقدر نتجنبها ؟
و لو حصلت بينكم هنتعامل معاها ازاى ؟
تربيتنا لأولادنا هنركز فيها على ايه ..و ايه مدى مشاركته فى التربية و دوره كأب بيتخيله ازاى ؟
الزواج هو التقاء حياتين ...
اتكلمى فى حياتك قبل الزواج
و اساليه عن كل تفاصيل حياته قبل الزواج
و بعدين خططوا مع بعض هتكون حياتكم ازاى بعد الزواج مع بعض
هو دا الى المفروض يكون الكلام عنه فى فترة الخطوبة
يارتنی قرأت كلامك ده يا دكتورة وانا مخطوبه
ردحذفكان فرق معايا كتيرررر قوی