الطفل و هو صغير تتحكم فى تصرفاته الانفعالات ......انفعالات الحب و الكره و الخوف و الألم والاحباط غيرها
و بالتدريج مع نمو العقل ... مع حسن التوجيه من حضرتك ...يبدأ يتحكم فى هذه الانفعالات بالتفكير و العقل
تلاقيه مثلا و هو صغير مش بيحب عمو فلان و مايروحش يسلم عليه
لكن لما يكبر شوية و يعرف ان دا عمه و مايصحش انه مايسلمش عليه ..علشان دا قلة ذوق بيسلم ...مهما كانت مشاعره ناحيته
يقدر يتحكم فى تصرفاته بالعقل
و هو صغير بيخاف من الحيوانات و ممكن يبكى منها بشدة ...
لكن لما يكبر و يعرف و ياخد خبرة ان هذه المخلوقات أليفة و ممكن يلعب معاها و انها تؤذى فقط من يؤذيها خلاص الخوف بيروح بالتدريج
و هو صغير لما حد يرفض له طلب يبدأ يعيط و قد يصرخ و يرمى نفسه فى الأرض و الا يخبط دماغه فى الحيط
لكن لما تعلمه من صغره انه دا أسلوب غلط و أنه لن يحصل على ما يريد بالاسلوب دا ابدا و انه يطلب بأدب علشان دا أدعى أن يستجاب له هيبدأ يتعلم أهمية الأدب و انه يحصل على مايريد لو تأدب
ويتعلم ان مش كل طلباته لازم تجاب لان ممكن يكون طلبه غير متوفر أو مش هنقدر نجيبه دلوقت و لا حتى هنقدر نجيبه خالص
بالتدريب و الخبرة بيفهم و يتعلم ان الدنيا مش ممكن هتديه كل حاجة و انه ازاى يتغلب على مشاعر الاحباط و ينظر الى ما بين يديه و لا يركز على ما ينقصه
و هو صغير ممكن يضرب اخواته أو أصحابه أو يشتمهم أو اسلوبه يكون عنيف معاهم علشان عايز منهم اللعبة الى فى ايديهم
لما يتعلم مع الوقت ان دا اسلوب هيكره فيه اخواته و اصحابه و ان احنا غلط اننا نفرض ارادتنا على الآخرين واننا ممكن بالحب نحصل على ما نريد
و ممكن بدل ماتاخد اللعبة تلعب بيها لوحدك ممكن نتشارك مع بعض و ان اللعب كدة هيبقى أحلى
يعنى لو لعبنا مع اصحابنا بالكورة ألذ من انى آخد منهم الكورة و العب بيها لوحدى
و هو صغير لما يعيط انه ارتكب غلط و اتعاقب و يتعلم و يتأكد على فكرة انك مش عيب انك تغلط ...انت ممكن تغلط بس لازم تسيطر على نفسك و تتجنب الغلط دا مرة تانية
و العقاب دا علشان تتجنب التكرار تبقى قادر على السيطرة على نفسك
الطفل لما والده ووالدته يهملوا الجانب دا ..جانب تعليم الطفل السيطرة على مشاعره بالعقل ..
بيكبر و لم ينم فى عقله ازاى يسيطر على انفعالاته
فبدل ما يعيط و هو صغير هتلاقيه لما يكبر بيصرخ و يشتم و يمكن يضرب علشان ينفذ الى هو عايزه
هتلاقيه مستسلم و محبط دائما لأى فشل حصل الله ....لانه لم يتعلم كيف
يسيطر على مشاعر الاحباط و يبدأ من جديد
هتلاقيه علطول كئيب و حزين لانه لم يتعلم كيف يسيطر على احزانه بعمل ايجابى
للأسف الشديد احنا كعرب ..شعوب انفعالية ...انفعالاتنا مسيطرة دايما على تصرفاتنا ...و نورث هذا الامر لابنائنا
تلاقى الاب أو الأم عصبية ...و ابنهم عصبى و يشتكوا ....
اذا كان الكبار مش عارفين يسيطروا على نفسهم ...هيسيطروا ازاى على انفعالات ابنهم ؟
تلاقى أم نكدية و دايما كئيبة و حزينة و دائمة الشكوى ....أولادها ممكن يطلعوا زيها....و هتشتكى ان ابنها او بنتها بيعيطوا علطول و مش راضيين ابدا و دايما مش حاسين بالرضا عما يمتلكون من اشياء و عايزين المزيد
تلاقى أب دايما متشائم و نظرته سوداوية لكل حاجة حواليه و يشتكى من ابنه انه فاشل طبعا لازم فاشل لانك مسود الدنيا فى وشه
تلاقى البنت بتعمل علاقات عاطفية بسرعة شديدة ومندفعة جدا ورا عواطفها و سهولة انه يضحك عليها لانها لم تتعلم أن تضبط مشاعرها دى بالعقل
تعلم أنت أولا كيف تسيطر على انفعالاتك علشان تقدر تعلم ابنك
اعد مع ابنك ..و حاول تتكلم بالعقل ازاى هذه المشاعر السايبة الى مالهاش رابط ممكن تكون مضره ليه فى المستقبل ...و ازاى لازم العقل يتحكم فى العواطف كى ينضبط السلوك
و ان وجود المشاعر مش هنقدر نسيطر عليها ..لكن هنقدر نتحكم فى سلوكياتنا بالعقل
مع ان هذه المهارة محتاجة تدريب مكثف للشعب العربى كله و خاصة الشباب منهم !!!!!!!
الى بتحكمه فقط الآن مشاعر الكره و الحب والاحباط و اليأس و الألم و قاعدين يموتوا فى بعض بدون عقل و لا منطق
مع ان السياسة الى المفروض تقوم على العمل العقلى و حسابات المصالح و المفاسد
و الا العلاقات الاجتماعية الممزقة بسبب غلبة مشاعر الغيرة والحسد و الانانية و حب السيطرة و
عندما تتحكم مشاعرنا و غرائزنا و انفعالاتنا فى تصرفاتنا نفقد انسانيتنا
و نعطل أجل نعمة ربنا وهبها لينا و هى نعمة العقل
و تسود شرائع الغابة حيث الحيوانات يلتهم بعضها بعضا
و ربنا يستر
ليست هناك تعليقات:
إرسال تعليق