بيحب ناس منهم أوى وناس عاديين و ناس مش بيرتاح لهم زى أى انسان عادى
و الحب زى اى حب بيحصل بشكل لا ارادى فالارواح جنود مجندة
و ابنك مشاعره دايما طاغية على عقله الصغير المحدود الخبرات و المعلومات
اتعجب من الآباء و الأمهات الى عايزين يفرضوا على الطفل علاقاته
العب مع فلان و ما تلعبش مع فلان
صاحب فلان و ماتصاحبش فلان
فلان دا وحش ملكش دعوة بيه و فلان دا كويس
و تلاقيهم دائمى النقد لمن يحبهم و يحترمهم و يكن لهم مشاعر طيبة
لما تعد تعيب فى اصحابه الى بيحبهم و تأمره انه يبعد عنهم
و تشتم فى مدرسيه
و تلعن فى مدربيه
و تتخانق مع أولاد الجيران
هتلاقى رد فعل ابنك حاجة من اتنين :
لو واثق فيك و بيحبك و انت بالنسبة ليه المرجع فى معرفة الناس
هو كمان معدش هيحترمهم
و هيبدأ يبعد عن اصحابه و يفقد ثقته فى الناس حواليه
و ممكن يميل الى العزلة و البعد عن الجميع و يفضل الوحدة علشان يتجنب تأنيبك و لومك الدائم ليه من ناحية
و علشان يتجنب أذى الناس لى انت بتخوفه منهم من ناحية تانية
و لو هو بيحبهم اوى و علاقته بيك أصلا متوترة و لا يثق فيك
هيبدأ يكرهك و يحس انهم اقرب ليه منك
و يترمى فى حضنهم أكتر و يسمع كلامهم أكتر و يبعد عنك أكتر و أكتر و خاصة عندما يدخل المراهقة و تفقد سيطرتك عليه
و ممكن لما يكبر يتجرأ عليك و يهينك و يتريق عليك زى ما كنت بتعمل معاه
علاقتك السليمة بابنك فى صغره أكبر ضامن الا يرتمى فى حضن اصدقاء السوء لما يدخل المراهقة
لانك ربيت فيه الثقة فى نفسه و حسن الاختيار من البداية
احترم علاقات ابنك .و عود نفسك الا تذكر أحد منهم بسوء أدامه
عود ابنك على ان الناس بشر يخطئوا و يصيبوا
قل له فلان فيه صفات كويسة كذا و كذا بس انا خايف عليك من صفة كذا الى فيه احسن تتعدى منه و تعمل زيه
او خايف عليك لانه طفل عدوانى ممكن يؤذيك بلسانه او بضربه
لا تأمره بأن يبعد عنه ..بل اديله حرية الاختيار و هو لما يجرب بنفسه هيبعد لاختياره و ارادته
لما ييجى يحكيلك على المدرس و المدرب تبين الاول
و اسال عن الموقف من المدرس او المدرب و لا تصدر احكام و انت سمعت من ابنك بس
لان ابنك غالبا لا يذكر الحقيقة كاملة ..
هو بيحكى الى هو حس بيه و ما رآه
يعنى مثلا ممكن يقولك هو اتعمل فيه ايه و بيخبى هو عمل ايه
عود ابنك على احترام الناس مهما كانت اخطاءهم و عيوبهم
واديله الثقة بانه قادر على اختيار الاصدقاء الكويسين ..علشان يكون أهل لثقتك دى
و راقب تصرفاته من بعيد لبعيد و نبهه الى الاخطاء الى انت شايفها بمنتهى الاحترام
علشان يقدر يحترم نفسه
و يحترمك بعد كدة لما تكبر
ليست هناك تعليقات:
إرسال تعليق