أعلم تماما ان الضغوط اليومية التى تتعرضى لها فى العمل أو فى البيت كتيرة
و انك لو فى أول الجواز بالذات بتحسى ان مسئولية كبيرة اتحطت عليكى مرة واحدة و انتى مش قادرة عليها و فاكرة قال ايه جوزك هيساعدك
و ان ساعات الرضيع و خاصة لو أول طفل بيبقى أزمة كبيرة و مشكلة مانتيش عارفة تتعاملى معاها ازاى و متوقعة انك جوزك هيساندك
لكن كتر الشكوى حبيبتى مش هيحل مشاكلك و لا هيقلل الضغط
بالعكس كتر الشكوى بيخلى الحمل و المشكلة تتضخم فى عقلك و تسيطر عليكى حتى و انت قاعدة مع الناس
و بدال ما تحاولى تنسى همومك معاهم ... بتكونى دايما مصدر للطاقة السلبية و النكد كمان للآخرين
و لو بتخافى من الحسد ..ماتتكلميش على الحاجات الحلوة و اسكتى بدل ما تعدى تشتكى
الست الى غاوية شكوي بتفقد علاقاتها باصحابها مع الوقت ....و تفقد علاقتها بجوزها بالتدريج
و ساعات ممكن تفقده اعصابه ...لانه دايما بيحس انك مش سعيدة
و ان دا اتهام ليه انك مش بتساعدنى و لا شايل معايا ...فبينفعل و يزعق و يهب فى وشك
و بصراحة عنده حق و خاصة لو راجع من الشغل تعبان و قرفان
و بعدين يلاقى فى وشه كوم مشاكل تانية فى البيت ....
الراجل دا غالبا بيطفش من البيت خالص ...ولايعود الا للنوم او الاكل
او بيكون عصبى و منفعل عليكى علطول
لازم تفرقى أولا بين الأحمال اليومية و المشكلات
يعنى رعاية الاطفال الصغار و المذاكرة و شغل البيت و مسئوليات العمل دى حاجات يومية بتتعمل مش لازم كل يوم نشتكى منها
لو عندك مشكلة مش عارفة تحليها استشيرى حد كبير عاقل فيها
و لو محتاجة المساعدة اطلبيها صراحة ..بدال ما تشتكى
بس مش تعدى تشتكى من كل حاجة و كل حد و تجيبى من الماضى و الحاضر و المستقبل
دى فعلا حاجة تزهق جدا
لو حاسة فعلا انك مش بتقدرى تمسكى نفسك ..
اكتبى مذكرات ..بدال ما تتكلمى اكتبى ..
المذكرات بتطلعى فيها كل الى نفسك تقوليه و مش بتعمل مشاكل
كمان ميزتها انك لما بتهدى ...و تكونى رايقة وتعدى تقرى هتشوفى كم السلبية الرهيبة الى فى كلامك ..
انت ممكن ساعتها تشوفى نفسك فعلا كئيبة و هتحاولى تتغيرى
حبيبتى ..الشكوى الكتير لن تحل مشاكلك
و مش هتريحك
و لن تجلب التعاطف و المساندة و المساعدة الى انت عايزاها إلا لو واحد بتعرفيه لسة جديد ..لسة هيستحمل ..لكن هينفر منك الناس القديمة
انت لو مخنوقة أوى و عايزة تتكلمى مع جوزك قوليله من البداية ..
انا لا اتهمك بالتقصير ..و لا عايزاك تحل مشكلتى ..فقط اسمعنى وانا فى حضنك و طبطب على
و ربنا يعينك على نفسك يارب
ليست هناك تعليقات:
إرسال تعليق