قالت : اكتشفت بعد الجواز ان زوجى مش الدماغ ولا الشخصيه اللي كان نفسى فيها بس هو حد طيب مش وحش بس مش متفهم خالص و دماغه مقفوله اوي و اهتماماته هايفة
ومش قادره ولا عارفه أحبه ومش عارفه أعامله المعامله اللي ترضي ربنا بجد
للأسف غالبا دا بيحصل مع سرعة الزواج ...مفيش فترة خطوبة كافية انها تفهمه و تقتنع بيه ...شغل بنى آدم كويس اتجوز بنى آدمة كويسة و الزقهم لبعض
و بيحصل لما تكون الزوجة عقلية متفتحة و مستوى ذكاءها أعلى من زوجها ..و شخصية اكثر نضجا منه
حاولى تغيرى نظرتك ليه
بدل ما انت شايفاه أقل منك و شايفة نفسك انك الافضل ..انظرى ليه انكم مختلفين ...واكيد هو متميز عنك فى امور اخرى ..و منها طيبته مثلا ...
ممكن يكون انسان عاطفى اكتر و دا هيخليه انسان رحيم و حنون و دى نعمه كبيرة
يعنى لو انت مخ و عقلية هو قلب و حب و رحمة و ممكن تعتبرى دى انكم بتكملوا فيها بعض ...انت المخ و هو القلب
لو انتوا بتختلفوا لانه مقفل ...
الشخصية دى مع حسن التواصل معاها و حسن العرض لكلامك و اسلوبك .بحيث تتجنبى تماما انك توصليله احساسك دا (الاحساس بانه اقل ) ممكن سهل جدا يقتنع بآرائك ..
الشخصية الطيبة بتكون غالبا حساسة ..افكارك بانه هايف او اقل ذكاء او تفتح ..دا هينعكس عليكى فى تعبيرات وشك و نظراتك و فلتات كلامك لامحالة ...والاحساس دا هيوصل له و هيخليه حاسس دايما انك مش محترماه فيقفل معاك اكتر
لو انتى حاسة ان مخك و عقليتك انضج ..انتى ممكن اوى تؤثرى عليه فى قراراتكم و حل مشكلاتكم بس تتعلمى فنون التواصل معاه و امدحي دايما طيبته و اخلاقه و المميزات الجميلة الى فيه ...امدحى تصرفاته الجميلة معاكى و خلى تركيزك عليها
مفيش فى الدنيا انسان كامل
ولو كنت اتجوزت واحد عقلية و متفتح و ناضج ...كان ممكن تلاقيه قاسى أو عنيد أو غير مسئول
علشان كدة دايما بنقول مفيش سعادة مع الصبر ..لانك حاسس انك متضرر
أقل السعادة فى الرضا ...أن ترضى بما قسمه الله لك و انت لا متضرر ولا حاسس بالنعمة
و قمة السعادة فى الشكر ...أن تشكر ربنا على هذا الانسان لانك شايف فيه دايما مميزاته جميلة
ليست هناك تعليقات:
إرسال تعليق