الحب بتاع الافلام و الاغانى دا خيال مش موجود
و يمكن يكون فى بدايات العلاقة و التعارف
كل واحد فيهم حاسس ان التانى مالى عليه حياته و عايش بس ليه و علشانه
المشاعر دى بتهدأ بعد كدة
الحب الحقيقى ربنا عبر عنه بالمودة و الرحمة ...الحب الهادى العاقل ..بدون انانية ..بدون حب تملك ..بدون احتياج ..بدون غيرة و شك
الرغبة الحميمة فى ان خطيبى او زوجى يملأ على حياتى دى معنى كدة انه هيفقد حياته
يعنى هتزعلى لما يروح يعد مع اصحابه و يتبسط معاهم
هتزعلى لما يروح يعد مع اهله و يتبسط معاهم
هتزعلى لما يروح شغله و مايتصلش خمس ست مرات فى اليوم
زوجك بيشتغل على الاقل 8 ساعات فى اليوم
و بينام 8 ساعات
تفتكرى هل من العقل و المنطق انه يعد لازق فيكى ال8 ساعات الباقية
دا ماينفعش ..دا حب تملك و انانية
انك تكونى حزينة و كئيبة طول ماهو مش معاك دا غلط
هى عايزة تحس انها محور حياته و اهم حد فيها
و ياريت لو قعد معاها هتكون مبسوطة دى هتفضل تشغل اللوم و التانيب و العتاب والنقد و كدة تسيبنى لوحدى و كدة ماتسألش عنى
و فيه رجال ايضا عندهم هذه الانانية و حب التملك فهو لايسمح لزوجته انها تروح لاهلها
او ان يبقى ليها صداقات
او انها تشتغل
او انها تمارس هواية والا تروح دورة و الا تروح تسمع محاضرة
عايزها كدة قاعداله منتظرة طلباته
و ياريت بيسعدها بالقاعدة معاها
دا طول ماهو قاعد طلبات و تعليمات و انتقادات
هو بيبقى عايز يحس انه محور حياتها و اهم حد عندها
لازم كل واحد منهم يجاهد الرغبة دى
لازم تحترم رغبة الاخر فى انه يكون له وقت خاص بيه
لو كل واحد منهم حس بالحرية فى قضاء الوقت بعيد عن التانى و احترموا هذا الامر
هيبقوا مشتاقين لبعض
و هتبقى اوقات اللقاء اوقات ممتعة
هيلاقوا حاجة يتكلموا فيها مع بعض
هيلاقوا احداث يحكوها لبعض
كل واحد فيهم هيحس انه محتاج يرجع للحضن بتاعه ...للسكن ...للدفء ...للاسرة
الحب مش امتلاك و انانية و غيرة من اى حاجة بتشغل شريك حياتى عنى
الحب الحقيقى هو احساس بالسعادة طالما هو سعيد
حتى لو سعادته انه يكون بعيد عنى
ليست هناك تعليقات:
إرسال تعليق