راعى ظروف الناس

أغلب الناس تعساء
اغلب الناس تعرضوا لتجارب سيئة فى حياتهم
اغلب الناس بيمروا بظروف صعبة
اغلب الناس عندها آمال و طموحات محققوهاش

اغلب الناس حاسة بالندم
اغلب الناس حاسة الدنيا وحشة أوى
اغلب الناس حاسة بالقلق و التوتر
الناس حاسة بالقهر و الظلم و الاهانة

ما تكونش انت و الدنيا عليهم
راعى ظروف الناس و خليك دايما لطيف معاهم مهما عاملوك بشكل سىء

لو عاملته بشكل وحش و عرفت ظروفه ضميرك هيوجعك
ولو عاملته بشكل سىء هيرد السوء بالسوء و يتصاعد الموقف اكتر و اكتر
لو عاملته بشكل كويس هتحس انك انتصرت على نفسك و شيطانك
ربنا بيقول (و جعلنا بعضكم لبعض فتنة أتصبرون )
يعنى ربنا بيحطك فى اختبار و فتنة باذيته ليك علشان تبان اخلاقك و صبرك الحقيقى
انت لو قاومت تعامله بالمثل هتحس انك نجحت فى الامتحان و فى الفتنة الى ربنا حطك فيها

و يمكن ربنا يمن عليك و تبقوا حبايب مع الوقت
و لما يلاقيك بترد الاساءة بالاحسان و عاذره و عندك قدرة انك تحتويه و تحتوى لحظات ضعفه و قهره و تعبه هيحبك

و يتحقق قول المولى عز وجل
{وَلا تَسْتَوِي الْحَسَنَةُ وَلا السَّيِّئَةُ ادْفَعْ بِالَّتِي هِيَ أَحْسَنُ فَإِذَا الَّذِي بَيْنَكَ وَبَيْنَهُ عَدَاوَةٌ كَأَنَّهُ وَلِيٌّ حَمِيمٌ *وَمَا يُلَقَّاهَا إِلاَّ الَّذِينَ صَبَرُوا وَمَا يُلَقَّاهَا إلا ذُو حَظٍّ عَظِيمٍ}

مش معنى كدة انك هتسكت
لكن ممكن ترد بمنتهى الادب و الاحترام

و دايما بقول عايز تعرف اخلاق الانسان الحقيقية اتفرج عليه فى اوقات الخلاف

لو عاملته زى ما بيعاملك ممكن تحس وقتيا بالانتصار او تحس انك وقفته عند حده
لكن عمرك ماهتحس بالسعادة لان عمرك ماهتحس بالحب
ولا براحة الضمير