التغيير سنة من سنن الله فى خلق الكون
كل حاجة بتتحرك و تتغير ..الزمان بيجرى ..و الاماكن بتتغير ....
دا حتى الكائنات الحية الآخرى بتتطور ..و كائنات بتنقرض ..و كائنات بتكتشف جديد
و نجوم بتتولد و نجوم بتختفى
و طبيعى جدا ان الانسان بيتغير
كل يوم بيمر عليه بيتعلم حاجة جديدة
كل يوم بيكتسب خبرة جديدة
و معدل التغيير دلوقت بقى أسرع ...لان وتيرة الحياة بقت أسرع بكتيييير
انت لما تيجى تحكى عن نفسك لاولادك من عشرين سنة مثلا ...
بتعد تتأمل كدة و تتعجب ازاى انت اتغيرت ..افكارك و شخصيتك و مشاعرك و نظرتك للحياة ككل ...حياتك كلها اتغيرت
و ناس كتير تيجى تشتكى ..صديقى اتغير ..فلان اتغير ..جوزى اتغير ...ابنى اتغير ...مراتى اتغيرت ...ابويا اتغير
لو رفضت التغيير انت كدة بتقف ادام سنن ربنا فى الخلق
تقبل التغيير
و قبوله يعنى انك تستوعبه و تفهمه كضرورة بشرية بتحصل لكل الناس ..وليك انت شخصيا
و انه أمر طبيعى جدا
الناس مشاعرها بتتغير و افكارها بتتغير طبيعى جدا
بس فيه انسان ذكى بيقدر يستوعب الفكرة و يتقبلها ان عادى الناس لازم تتغير
و فيه واحد بيقفل و يتربس و يعتبر التغيير دا مصيبة و يمكن يعتبره نفاق و عدم ثبات و كان بيضحك على و غش و خداع و خيانة و....و....و......
الزوج و الزوجة اكيد بيتغيروا بعد الاحساس بالمسئولية ..و كلما زادت المسئولية بيتغيروا اكتر و اكتر
بس المهم اننا نستوعب ان دا تغيير طبيعى جدا ...ماهوش غش و خداع
و المهم ازاى نعيش المسئولية و نقتنص اوقات بيننا و بين بعض نحط فيها المسئولية على جنب و ننتبه فيها لعلاقتنا علشان نفضل دايما قريبين من بعض و لا يبعدنا التغيير
زى اتنين شايلين حمل تقيل أوى ...و ماشيين فى طريق مع بعض
لا بيكلموا بعض و لا بيبصوا لبعض و لا بيسمعوا بعض ...هيبقى الطريق ممل اكيد
لكن لو كل كيلو كدة يحطوا الاحمال ...و يعدوا مع بعض يتكلموا مع بعض و يبصوا لبعض و يسمعوا بعض و يتبادلوا كلمات التشجيع و التحفيز و يحضنوا بعض و يبوسوا بعض و .....
بعدين يشيلوا تانى و يكملوا الطريق
اكيد كدة هيخف الحمل و هيهون المشوار و هتحسوا كمان بمتعة الطريق و هتتمنوا انه ما يخلصش
ليست هناك تعليقات:
إرسال تعليق