أبيض و أسود

أحد أسباب تعاستك الذاتية
و الى بتخليك دايما حاسة بالضغط النفسى انك واخد الحياة أبيض و أسود ...
يا اما صح يا اما غلط ...يا اما يمين يا أما شمال
دايما أدامك خيارين بس ...
الى انا اخدته هو الصح ...و التانى دايما غلط

الحياة مش كدة نهائى الحاجة الوحيدة الى ممكن اقسم بالله انها غلط و كل الناس بتقول عليها غلط هى مايدخل فى دائرة الحرام ...

الحرام الصريح الى ورد كتاب الله عز وجل و سنة رسوله
يليه الخطأ القانونى ...انى ارتكب مخالفة قانونية لقوانين الدولة ..زى مثلا مخالفة اشارات المرور مثلا
أو الخطأ العلمى ..ثبت بالدليل العلمى انه خطأ ...زى فكرة أن القمر جسم معتم 

كل دى أخطاء عليها أدلة بتقول ان دا خطأ

لكن ماسوى ذلك لا يرقى الى درجة الحقائق التى لاخلاف فيها ...بل هو مجرد آراء نختلف فيها اختلاف كبير ..و اختلافنا فيها تبعا لشخصياتنا و خبراتنا و ثقافتنا و تربيتنا 

الطبائع الشخصية مفيش فيها صح و غلط ... اختلاف الرأى فى الناس و الاحداث و الاشياء ...مفيش فيها صح و غلط
اغلب حياتنا تقع فى دائرة الرمادى ...حاجات لا هى صح و لا هى غلط ....كل واحد بيشوفها بلون مختلف 

دا غير الالوان الكثيرة جدا الموجودة .... الاحمر و الاخضر و الازرق 

دا حتى نور الشمس لما تحلله هتلاقيه الوان الطيف السبعة 

لما تكون مقتنع فى قرارة نفسك ان تصرفات الناس و طبايعها و الاحداث الى حواليك و الاشياء كمان ملونة 

دا بيخلى عندك مرونة كبيرة فى تقبل الآخرين و خاصة شريك حياتك 

 مش علشان هو مختلف عنك فى الطباع يبقى هو غلط و لازم تصلحه
مش علشان رأيه مختلف فى بعض الاحداث يبقى هو غلط و رأيك انت الصح 

مش علشان قراراته مختلفة عن قراراتك يبقى هو غلط 

مش علشان نظرته للامور مختلفة يبقى هو غلط و مش فاهم

احترم الاختلاف بينكم ...و خدها على انها مجرد اختلافات و ليست عيوب 

حتى مع اولادك تعامل معاه على انه طفل حتى لو اطول منك بس مازالت خبراته و تفكيره محدود 

علشان اعصابك ترتاح و تقدر تتعامل مع الاختلاف دا بدون عصبية و ضغط نفسى تقبل اختلافات الناس عنك 

هتلاقى الناس بقت احلى