تفقدين حب زوجك بعدم الثقة فيه و فى حبه ليكى و تمسكه بيكى
و دا بيخليكى دايما تتصرفى تصرفات تدل على عدم الثقة
تساليه دايما : انت بتحبنى ..
طب لو حصل لى حاجة هتزعل على؟
طب انت بتحب تعد معايا ..
طب انت ممكن تسيبنى ..
طب انت ممكن تتجوز ...
طب انت .....طب أنت
كنت فين ..كنت مع مين ..كنت بتكلم مين ...رايح فين ...عملت ايه؟
كان فيه ستات معاكم ....كانوا حلوين ...
هذه الاسئلة مؤلمة لزوجك و بيخليه يحس انك مش واثقة فيه ...و خاصة لو هو انسان فعلا كويس
بتدورى وراه و بتراقبيه ..
تتصلى بيه عشر مرات و هو برة البيت علشان تتاكدى هو فين
تدورى فى اللاب بتاعه والا الموبايل
تدورى فى هدومه و اوراقه عن اى حاجة تثبت انه خاين و عميل
تقصقصى ريشه أول بأول و ماتخليهوش يعرف يحوش لبكرة ابدا
عايزة تروحى معاه فى أى مكان و خاصة لو لسة معندكيش اولاد و تزعلى لو راح أى مشوار من غيرك
تتفرسى لما يروح يتبسط مع اهله او مع اصحابه و دايما شاكه فيه انه اصلا قاعد معاهم
دايما ترددى يا مآمنة للرجال ...يا مآمنة للمية فى الغربال و تعتبريه شعارك فى الحياة
حبيبتى :
انا عارفة ان رجالة اليومين دول لم يعد لهم أمان و سهولة التواصل مع الجنس الآخر عبر الموبايل و الانترنت جعلت الخيانة سهلة لاينجو منها الا من عصم ربى
و عارفة أن رجل هذه الأيام لايمنح أبدا زوجته الاحساس بالأمان
بالحديث الكتير عن الستات الآخرين و جمالهم
اوبالحديث عن الزواج التانى
او بالتعلق المريب بالموبايل بتاعه
و عدم التعبير الدائم و المستمر عن حبه بوسائل متعددة و التى تحتاجها المرأة كى تشعر بالأمان
وساعات بيخبى عليها حاجات تكتشفها بعد كدة سواء دخله المالى او علاقاته
لكن فيه فارق بين مشاعرك الشخصية الى جواك و التصرفات الناتجة عنها من كلمات و سلوكيات
مشاعرك بعدم الثقة انا لا الومك فيها ..ساعات تصرفات الزوج بتجنن
لكن ربنا أعطانا العقل علشان نتحكم فى تصرفاتنا
تحكمى دايما فى كلامك وتصرفاتك بقدر ما تستطيعين و امنحيه الثقة
قوليله دايما انا واثقة فيك و فى حبك لى و عارفة انك مش هتعمل حاجة تؤذينى
الافعال الى ممكن تدخل فى قلبك الريبة اسأليه عليها بدلع فى وسط الكلام ..مش بلغة وكيل النيابة
توقفى عن لعب دور المفتش كرومبو و البحث فى متعلقاته انه ليس طفل صغير خايفة عليه
احساسك المزمن بعدم الثقة يفقدك الاحساس بالسعادة و الأمان و هيتعبك انت نفسك و لن يوقفه عن تصرفاته
حاولى تزودى ثقتك انت فى نفسك بانك تنجحى فى حاجة و تبنى الثقة دى جواك انتى
كلامى طبعا عن الرجل الذى لم يثبت عنه الخيانة قبل كدة
لكن الرجل غير الملتزم فى علاقته بيكى ...فربنا يكون فى عونك و قلبى معاك
ليست هناك تعليقات:
إرسال تعليق