تفقد حب شريك حياتك بالنقد المستمر بهدف محاولة تغييره و تغيير سلوكه
كل انسان فيه عيوب و مميزات ...محدش فى الدنيا خالى من العيوب و لا يرتكب الأخطاء
و زى ما أنت بتضايق لما حد يقول لك عيوبك ..أو يفكرك بأخطائك ..الناس برده بتتضايق من هذا الأمر
و يزداد الضيق و الألم عندما يقال بأسلوب غاضب أو بسخرية أو استهانة
أو أسلوب تسلطى متحكم افعل و لا تفعل
يعنى مش الكلام بس ...لكن الأسلوب كمان بيزود المأساة
و إن كان الناس بتضايق قيراط من الاسلوب دا ...فشريك حياتك بيضايق 24 قيراط
لانه عايش معاك فترات طويلة
ولو الناس بتستحملك الحبة الى انت قاعدهم معاهم ...محدش هيقدر يستحملك العمر كله
ولانه بيفترض دوما انك بتحبه و عايز دايما يحس انك معجب بيه
وانك شايفه احسن راجل / ست فى الدنيا
و بدال بتحبه يبقى لازم تحبه بعيوبه و اخطائه .....مش تقف له على الواحدة ..هو الحب الحقيقى كدة
تفقد المرأة الكثير من حب زوجها بدوام انتقاده و تذكرته باخطائه أو تقصيره معها أو عيوب شخصيته و محاولة نصحه
و بالقاء التعليمات و التوجيهات لاى عمل يقوم بيه حاليا أو مستقبلا
و ينهار الحب سريعا لو كان الاسلوب بسخرية و انتقاص من قدره او بأسلوب الأمر و النهى المباشر
و قد يحل محل الحب الكره و الغضب عندما يحدث ذلك أمام الناس ..أدام أهلك أو أهله ..و يشتعل الشجاروالحريق
ويفقد الرجل حب زوجته تماما بالبحث عن كل خطأ و كل تقصير حصل منها و القاء الأوامر و التعليمات طول النهار
النقد المتواصل مش هيصلح شريك حياتك ..بالعكس بتخليه يسوء اكتر ...و يزداد عند
و يمكن يطنش ..طالما مش بيعجبك العجب
دا غير كمان الى هيتكوم جوة قلبه من غضب و كره و غل
و ساعات بيبدأ هو كمان ياخد نفس المنحى فى التعامل معاك و يبدأ يعذبك بانتقاداته و أوامره زى ما أنت بتعذبه
التغيير و التعديل علشان يحصل محتاج حافز داخلى
و اكبر حافز ممكن يدفع الانسان للتغيير للأفضل هو المدح و اظهار الاعجاب والتشجيع ليه
احنا ليه بنكون اخلاقنا اجمل مع الناس برة ؟
لان كلنا ننشد القبول و الاعجاب و الحب من الآخرين
فلما نيأس من اننا نرضى شريك حياتنا مهما عملنا بنقول خلاص ...مفيش فايدة ..اديله الوش التانى
و يسأل الازواج امدحه ازاى و هو قارفنى و مطلع عينى
مفيش انسان فى الدنيا مفيش فيه مميزات ...او بيعمل تصرفات طيبة و نبيلة
مفيش انسان فى الدنيا ملوش اوقات عمل فيها حاجة كويسة
دايما بينك و بين نفسك فكر فى مميزات شخصيته
افتكر تصرفاته الجميلة النبيلة الى عملها و امدحه بيها
افتكر الحاجة الى كنت معجب بيها ايام الخطوبة و فى اوائل الجواز و حاول تظهرها و تذكرها دايما فى كلامك معاه
فكر فى مشاكل اصدقائك و صديقاتك الى ربنا عافاك منها الحمد لله تعالى ..
دا بيخلى تركيزك دايما على الكويس .و بيحسسك بالرضا عنه ...
و بالحب ليه ...مهما عمل من اخطاء
فيه ناس ماتقدرش ..بتحس بالتوتر الشديد لو ماقالتش الغلط ...
لكن علاج توترك مسئوليتك انت ...مش مسئولية شريك حياتك انه يمشى فى كل حياته وفقا لتعليماتك و توجيهاتك فى كل صغيرة و كبيرة دا أمر خانق بيحسسه انه مسجون وانت السجان
و فيه ناس فاكرة ان دا ميزة و انا مبعرفش اجامل و مشكلتى انى صريح و فرحان بنفسه اوى و شايف نفسه احسن من الاخرين بالطبع دا
بس لو انت فرحان ..بس انت بتؤذى الناس ..و مش من حقك تؤذى الآخرين أبدا بطبعك الى انت فاكره كويس و بتفتخر بيه
انت عامل زى الناظر الى ماسك الخرزانة للناس و قاعد تضرب فيهم ...انت مش من حقك تربى الناس و تعلمها الصح والغلط
كمان امدح الاعمال الطيبة ادام اهلك ..و ادام اهله ...دا بيزود فرحته جدا
امدح و اظهر اعجابك بيه و اشكره على اعماله الجميلة ..دا هيخليه يحس انه شريك حياة ناجح
و هيخليه دايما عايز يكون عند حسن ظنك ..وانه يحاول يغير من نفسه علشان لايفقد اعجابك و نظرتك الجميلة ليه
لكن طول ماهو حاسس انك مش راضى عنه ..و انك مش بيعجبك العجب مهما عمل دايما هيحس ان مفيش فايدة ..
و هيستمر على اخطائه و على عيوبه
بقالك سنين بتجرب النقد و مفيش فايدة طب ما تجرب طريقة تانية ..و لن تندم
ليست هناك تعليقات:
إرسال تعليق