قالت : اكتشفت ان زوجى بيكلم بنات على الانترنت ...انا هتجنن
أولا : هدى نفسك ..فلست وحدك ..هذا مما عمت به البلوى للأسف الشديد ...مع انتشار وسائل التواصل اصبحت العلاقة بين الرجال و النساء سهلة و سهل اخفائها مما يغرى بالانسياق ليها
ثانيا : لا تواجهيه ان كنت لسة ما واجهتوش
لانه هيطلعك انت السبب و انت الى غلطانة و ستين غلطانة انك بتتجسسى على موبايله و انت الى كلامك غلط و بتعلى صوتك و ازاى مش واثقة فيه
و انت الى مهملة فيه و مهملة فى نفسك
و انت و انت و انت ....المهم فى النهاية انت الى هتطلعى غلطانة
ثالثا : خليك دايما واثقة فى نفسك مش انت السبب دا طبعه المهبب وفراغه عينه وحتى لو أهملت اوشكيتى او ارتكبت خطأ ما
فهذا ليس مبرر أبدا لوقوعه فى الغلط
فخطأ الآخرين ليس مبرر لوقوعك فى الغلط
و دى مش حجة هتقدر تتحجج بيها أدام ربنا لما يسأله عن علاقاته النسائية
وزى ربنا ما بيبتلى واحدة جوزها بيشرب حشيش ..
أو مدمن كورة ...أو مدمن سياسة ...او مدمن شغله ...او مدمن عزلة ووحدة ....انت ربنا ابتلاك بواحد مدمن ستات
رابعا : حاولى تفتكرى دايما ايجابياته التانية يعنى أكيد فيه مميزات حلوة تخليك تقدرى تستحمليه
خامسا : لازم تشوفى الموضوع من وجهة نظره علشان تقدرى تهدى نفسك ..
الرجل ينظر الى الموضوع (للاسف) على انه مش خيانة دى تسالى زى أزأزة اللب
و فاكر ان طالما الشرع اداله الحق فى الزواج التانى يبقى من حقه يتسلى مع الستات لحد مايلاقى الى ممكن يتجوزها
و بيعدوا يبرروا لنفسهم الحرام علشان يقتل ضميره فما تحاوليش تقولى أدامه ان دى خيانة لان الخيانة من وجهة نظره هو الزنا الكامل
سادسا : اكثر ما يؤلم الرجل (ان كان لسة عنده بقايا ضمير و اخلاق ) احساسه ان مراته واثقة فيه
يعنى تلمحى من بعيد لبعيد تصور صحبتى اكتشفت ان جوزها بيعرف ستات على النت ربنا يكون فى عونها
دنا بحمد ربنا على النعمة الى عندى يا حبيبى
ولومش قادرة و عايزة تواجهيه ..
كلميه بمنتهى التماسك و الثقة فى النفس ..و بلاش شغل أنا اتصدمت ..انت خاين ..انت نزلت من نظرى ..والبكاء و العياط و الانهيار
انت قوليله انا واثقة فيك و فى حبك لى و فى رجاحة عقلك و اخلاقك (حتى لو بالكدب )
و عارفة ان دى لحظة ضعف و هتعدى و هتقدر تتغلب عليها
( بتوجع الراجل أوى الحتة دى )
سابعا : لو هو فى منتصف العمر ..دى فترة معينة بيمر بيها الرجال و بينصلح حالهم بعد كدة (غالبا )
توقفى تماما عن مراقبة مايقوله و مايفعله بطلى تتجسسى على موبايله لأنه لن يجلب ليكى الا النكد و الهرى و الغضب
ثامنا :ابحثى عن نفسك و سعادتك بعيدا عنه
زاولى انشطة تسعدك و تدخل البهجة الى قلبك خلى ليكى صديقات ثقة جنبك
ماتخليهوش مصدر دائم لنكدك و دورى انت على سعادتك بنفسك
علشان تقدرى تتخلصى من الضغط الى عليكى و تستعدى للمعركة
تاسعا : انت مش أقل من البنات الى هو عارفهم على الفيس لا علما و لا جمالا و لا ذكاء
كل الحكاية انهم بيعرفوا يستخدموا سلاح الانوثة كويس أوى و بيستخدموا الخيال الى الرجالة محتاجاه
و حسب نوعية المحادثة معاهم
انت بشطارتك ممكن تجذبيه ليكى تانى ...
بس دى محتاجة قوة نفسية عظيمة على تخطى الاحساس بالخيانة و محتاج رغبة قوية فى استعادة زوجك
و بعدين التخطيط الذكى لكسبه هو شخصيا
انت شوفتى البنات بتجذبه ازاى و بتقوله ايه و اعملى زيهم
دا جوزك حلالك .. لو كلامهم جنسى ..كلميه جنسى دا انت ممكن تجننيه بالدلع و المياصة و تهدى حيله بالرغبة و الاغراء لحد ما يقول خلاص حرمت
و لو الكلام مجرد فضفضة و بيحكى عن نفسه و قدراته و انجازاته و بطولاته الخارقة يبقى هو غالبا مفتقد الاعجاب و التقدير منك ودايما انت محسساه انه مش مالى عينك و محسساه انه مالوش لازمة فى حياتك حاولى تغيرى اسلوبك معاه و تنفخى فيه شوية
ولو كلامه مجرد هزار و مرح حاولى تكلميه على الفيس بنفس الطريقة
فيه ناس بتحب اوى الكتابة لانها بتديهم قدرة على التخيل و بتديهم القدرة على الخداع
حاولى تستعيدى زوجك و تصلحى اى تقصير منك
و ادى لنفسك و ليه مهلة تصلحوا علاقتكم تانى
قوليله لو انا مقصرة معاك فى حاجة انا مستعدة اصلحها
لكن انت كمان لازم تحاول من ناحيتك تخلينى أثق فيك و أحس بحبك و الأمان معاك و اطلبى الى انتى عايزاه علشان تعيدى ثقتك فيه تانى
و لو ماقدرتيش ..يبقى لايكلف الله نفسا الا وسعها
لو ماقدرتيش تتغلبى على الشك و الغيرة و الغضب و الرغبة فى التجسس عليه الى ممكن يحطم اعصابك و يشغل بالك ويعيشك فى مرار يبقى الانفصال قبل ما تتجننى
ليست هناك تعليقات:
إرسال تعليق