تفقدين حب زوجك إذا توقفت عن التقدير و الشكر و الامتنان
كلنا يعشق كلمات الشكر و التقدير لأعمالنا مهما كانت بسيطة
و تتوقف قدرتنا على العطاء عندما نفقد هذا الدافع
خلى دايما على لسانك جزاكم الله خيرا
ما اتحرمش منك ابدا
احنا من غيرك حياتنا مالهاش معنى
ربنا يخليك لينا يارب
شكرا حبيبى
الكلمات دى تعتبر وقود محفز للرجل على العطاء زيادة
لاتنسى ابدا التعبير عن الامتنان لو وقف معاك فى موقف صعب او مع حد من أهلك
أوعى تحسسيه انه معملش حاجة و ان عمله دا ييجى إيه جنب الى بيعمله فلان لمراته
أوعى تحسسيه إن اعماله أقل من توقعاتك كنت فاكرة إنك هتعمل كذا و كذا
أوعى تحسى ان اعماله دى واجبة عليه و فرض عليه وهو بيعمل ايه يعنى اكتر من غيره
اى عمل مهما كان بسيط يستحق الشكر
الكثير من النساء بيشتكوا دا عمره ماقال لى شكرا على حاجة بعملها
طب و انت عمرك قلتيله شكرا على تعبه فى شغله ؟
هو بيعتبرمهمتك فى البيت و مع الأولاد زى مهمته فى شغله توزيع أدوار
اشكريه على تعبه فى شغله
اشكريه على اى مساعدة بيعملها ليكى
اشكريه على وجوده فى حياتك
كدة هتكسبى حبه و قلبه
و هيحس دايما انك الانسان الى بيقدر تعبه
ويمكن لما يشوفك دايما بتشكريه ..يتشجع على انه يشكرك و يشوف النموذج أدامه
عزيزى الزوج :
كلمات الشكر و المدح تعطى لزوجتك دافع و شحنة عاطفية جبارة للمزيد من العطاء و التفانى
تخيل حضرتك انت بتروح الشغل كل يوم 8-10 ساعات و تؤدى مهامك فيه و بتاخد فى آخر الشهر مرتبك بتاخد مقابل عملك و تقنع بيه حتى لو لم يشكروك على عملك
لكن هى بتاخد ايه و هى ممكن تكون شغالة من 16- 24 ساعة لو عندها بيبى
كلمات الشكر هى المقابل المعنوى الى بيشجعها على الاستمرار
تسلميلى حبيبتى
ما اتحرمش منك
جزاكم الله كل الخير
ربنا يكرمك و يجزيك كل الخير على تعبك
انا ممتن جدا للى بتعمليه فى بيتنا و أولادنا
كلمات ..مجرد كلمات مش هتكلفك حاجة و الله ..
بس تفعل معها الكثيرو تعطيها الحافز و الرغبة بدون شكاوى أو نكد
تخيل أنت واحد صاحبك بتحبه و بتساعده فى اى حاجة يطلبها منك و لا تجد منه اى كلمة تعبر عن شكره ..بل بالعكس دايما يتهمك انك مش واقف جنبه ..شوف احساسك ساعتها هيكون ازاى
كلمات الشكر منكم انتم الاتنين حتى بتحسسكم من جواكم بما يفعله الآخرمن أجلكم ..بيديك مع الوقت الاحساس بالرضا و السعادة بيه
و كما قال ربنا (و لئن شكرتم لأزيدنكم )
على فكرة دا مش فى شكر ربنا بس
دا شغال فى شكر الناس بعضها لبعض أيضا
ليست هناك تعليقات:
إرسال تعليق