قالت : عندى احساس مزمن بالذنب و جوزى دايما محسسنى انى انسانة فاشلة
حاسة انى مش ناجحة فى حياتى العملية ..مش دا الى كنت عايزة أعمله و اشتغله
حاسة انى مش ناجحة فى حياتى الزوجية ..علاقتنا دايما متوترة
حاسة انى مش ناجحة فى تربية اولادى ..اولادى مش عاجبنى تربيتهم
علاقاتى بالناس دايما فيها مشاكل
حتى بيتى ..مملكتى مش عارفة أديرها كما أريد
حبيبتى
الاحساس الدائم بالذنب من أسباب التعاسة المزمنة النابعة منك انت ..مالهاش علاقة بالى حواليكى ولا بجوزك و لا بأولادك
حتى لو جوزك شجعك و حفزك و أسبغ عليك من كلمات المدح و الاعجاب هتبقى عاملة زى القربة المخرومة مهما تحط فيها مية ..بتسقط من تحت
هيقولك الطبيخ جميل ..هتقولى بس ناقص ملح
هيقولك شكلك النهاردة جميل ...هتقولى بس انا تخنت اوى
هيقولك البيت النهاردة مترتب ..هتقولى بس لسة الحمامات مش نظيفة
مابالك و هو مش بيشجع و لا بيمدح أى حاجة
و ياسلام لو كان طول النهار انتقاد و توجيهات و تعليمات لاصلاح الاخطاء بيزود الطين بله
عزيزتى
مفيش حد فاشل فى كل حاجة فى حياته اكيد اتعلمتى و نجحت فى تعليمك و اشتغلت و دا انجاز
كونك اتجوزت و بقالك بيت و أسرة و أولاد دا فى حد ذاته نجاح برده
طول ما انت حاطة فى مخك انك انسانة فاشلة ...عمرك ما هتنجحى و لا هتحسى بالسعادة
دايما افتكرى نجاحاتك السابقة
دايما ركزى على الايجابيات فى نفسك و فى شخصيتك
دايما افتكرى الاعمال الكويسة الى انتى عملتيها فى حياتك
شجعى نفسك
وكل ما يجى الحساس بالفشل دا افتكرى من هم أقل منك
روحى زورى مرة النجوع و العشوائيات و شوفى الفشل الحقيقى
قارنى نفسك بمن هم أقل منك علشان تحسى انك كويسة الحمد لله
حددى بالظبط نقاط الفشل الى انتى حاساها
ماتقوليش زواجى فاشل قولى زواجى ناجح بفضل الله تعالى لكن عندى مشاكل فى نقاط محددة
ماتقوليش اولادى فشلة ...قولى ولادى اولاد رائعين بفضل الله بس فيهم عيوب كذا و كذا
ماتقوليش انا فاشلة فى شغلى ..قولى بفضل الله انا ناجحة بس عندى مشكلة كذا
وبعد ما تحدديها
ما تقفيش ادام مشاكلك كلها عاجزة عن حلها
دورى و ابحثى وسألى عن حلول عملية و بادرى بيها
فيه فعلا مشاكل مالهاش حل زى اختلاف الطباع بينك و بين الى حواليكى و دى محتاجة تأقلم و تعايش
و فيه مشاكل ليها حلول ...زى مشاكل العلاقات الحادثة ....و دى محتاجة تفكرى فى الحل و تبادرى بتنفيذه
ماتفكريش كتير فى حياتك فكرى فى حل لمشكلاتك و دورى على الحلول ..و ابدئى نفذى
حتى و ان ارتكبت اخطاء من منا لايرتكب اخطاء ؟؟؟
من حقك ان تخطئى ..بس المهم ماتكرريش الغلط
و حتى لو اتكرر ...جاهدى نفسك تانى و ابدئى من تانى
الناجحون يخطئون كثيرا ..و لكنهم يتعلمون من اخطائهم و لا يعودون اليها
لا تتوقفى عند الاخطاء ...بل قولى تعلمت من اخطائى كذا ...و سأصلح الخطأ
كلنا يرتكب الأخطاء
إن ارتكبت اخطاء شرعية فى حق المولى عز وجل بادرى بالتوبة و الاستغفار
إن ارتكبت أخطاء فى حق الآخرين بادرى بالاعتذار و رد الحقوق اليهم
إن ارتكبت أخطاء فى حق نفسك ....اعتذرى اليها و صالحيها ..وتعلمى درسا
لا تتوقفى كثيرا عند مشاعر الاحساس بالذنب و دايما شجعى نفسك و ابحثى من الأصدقاء و الأهل و الحبايب عمن يشجعك
احنا للاسف مجتمعات خبيرة فى تدمير الآخرين ..
اتربينا على النقد و الشتم و السخرية و التقليل من قيمة مايفعله الآخرون
ودا أثر كتيييير جدا على ثقتنا بنفسنا و احساسنا بالسعادة
اقعدى مع حد قريب ليكى و اسأليه عن أهم مايميزك ..
حد يوريكى الجانب الجميل فى نفسك و فى حياتك
احنا محتاجين اوى لحد يشجعنا
بس مع الوقت لازم التشجيع ييجى من داخلنا
علشان دايما تمسكى مفاتيح سعادتك بايديكى
الاحساس بالذنب عزيزتى احساس قاتل يقتل السعادة
فلا تضيعى حياتك و سعادتك و انتى عايشة جواه
ليست هناك تعليقات:
إرسال تعليق