التغيير يبدأ بحبك غير المشروط

قالت : حضرتك دايما تقولى ان مفيش فايدة فى تغيير شريك الحياة و ركزى على تغيير نفسك
و بعدين بتقولى ان هو ممكن يتغير

 ياحبيبتى :

لو انتى اقتنعت انه مش هيتغير ...هتحاولى تحبيه كدة بعبله ...و ترضى بيه زى ماهو كدة ..و تستحمليه علشان بتحبيه

الوسيلة الوحيدة اللى ثبت فعاليتها فى تغيير شريك الحياه هى منح الحب غير المشروط
يعنى انا بحبك كدة بعبلك ..بحبك بعيوبك ..بحبك بقرفك ..بحبك بالرغم من سلوكياتك و طباعك المقرفة

لما يحس انه محبوب ...بيبقى عنده دافع انه يحافظ على الحب دا و يكبره .....بانه يغير سلوكياته السلبية

لكن لو هو حاسس انه مش محبوب اصلا
و ان شريك حياته قارفه نقد و سخرية و اهانة و احباط و ألم و تعذيب نفسى
طب ايه الدافع انه يتغير ؟

مفيش حد بيتغير بالاهانة و النقد و السخرية و التبكيت و اللوم و التعذيب حتى اولادكم

و مش معنى كدة انك هتسكتى
انت هتعبرى عما يضايقك بمنتهى الحب و الاحترام و الذوق
لما بتعبرى بشكل جارح
هو بياخد طريقين كرد فعل ..
اما الهجوم و تحويل اى اذى الى خناقة كبيرة
واما الانسحاب من حياتك تماما الى الاصدقاء و الانترنت و الستات

والسؤال الى لازم تسأليه لنفسك بدل سؤال هل ممكن يتغير ؟

سؤال ..هل هتقدرى تحبيه حب غير مشروط ؟